Падзеі, факты, анонсы

22 сакавіка, Мінск /Кар. БЕЛТА/. Беларускую мову будуць вывучаць у кітайскіх ВНУ, паведаміў 22 сакавіка Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Цуй Цымін, выступаючы ў Доме дружбы на пасяджэнні маладзёжнага клуба "Юны дыпламат", перадае карэспандэнт БЕЛТА.

Асноўная ўвага ў час мерапрыемства была ўдзелена ролі дыпламатыі ва ўмацаванні дружбы паміж народамі Кітая і Беларусі. Паводле ацэнкі Цуй Цыміна, паміж краінамі ўстанавіліся вельмі добрыя адносіны практычна ва ўсіх сферах. Кітайскі дыпламат лічыць важным, што ў Мінску і іншых гарадах Беларусі школьнікі і гімназісты вывучаюць кітайскую мову. У тым, што дзеці дасягаюць нядрэнных поспехаў, пасол змог пераканацца, паслухаўшы кітайскія песні і вершы ў выкананні беларускіх хлопчыкаў і дзяўчынак.

Паводле слоў кіраўніка маладзёжнага клуба "Юны дыпламат" Алены Кашперка, дзеці не толькі добра спяваюць на кітайскай мове, але таксама шмат ведаюць аб гісторыі і выдатных мясцінах гэтай краіны. Сапраўды, яны ўпэўнена адказвалі на многія пытанні, якія датычацца Кітая. Акрамя таго, школьнікі змаглі задаць пытанні і паслу аб кітайскіх традыцыях і перспектывах, а таксама дружбе з Беларуссю.

Намеснік старшыні Беларускага таварыства дружбы і культурных сувязей Галіна Пяткевіч выказала ўпэўненасць, што сустрэча з паслом Кітая паслужыць больш актыўным беларуска-кітайскім сувязям у галіне адукацыі і культуры.

Намеснік старшыні таварыства дружбы "Беларусь - Кітай" Аліна Грышкевіч лічыць, што ў сценах Дома дружбы праводзіцца шмат мерапрыемстваў, разлічаных на маладзёжную аўдыторыю, якія даюць магчымасць больш даведацца пра Кітай, яго культуру і гісторыю. Насычанай абяцае быць і беларуска-кітайская праграма мерапрыемстваў на наступны год, напярэдадні 25-годдзя беларуска-кітайскіх дыпламатычных адносін.