Падзеі, факты, анонсы

Беларуская тэнісістка Аляксандра Сасновіч выйшла ў 1/16 фіналу турніру ў Дубаі

Фота з архiва

20 лютага, Мінск /Кар. БЕЛТА/. Беларуская тэнісістка Аляксандра Сасновіч (43-і нумар сусветнага рэйтынгу) з перамогі пачала выступленне на турніры катэгорыі WTA-1000 у Дубаі з прызавым фондам $2,7 млн, паведамляе карэспандэнт БЕЛТА.

Сёння ў першым раўндзе беларуска адолела ў трохсэтавым паядынку прадстаўніцу Іспаніі Рэбеку Машараву (93) - 2:6, 6:4, 6:4. Сустрэча прадаўжалася 2 гадзіны 10 мінут. У 1/16 фіналу Аляксандра Сасновіч згуляе з амерыканкай Кока Гаўф (6). У першым раўндзе парнага разраду Сасновіч і кітаянка Сюй Іфань перайгралі брытанскі тандэм Херыет Дарт / Эдэн Сілва - 4:6, 6:1, 10:6.

Яшчэ адна беларуска Вікторыя Азаранка (14) у 1/32 фіналу сустракаецца з расійскай тэнісісткай Настассяй Паўлючэнкавай (732).

Другая ракетка планеты Арына Сабаленка пачне выступленне з 1/16 фіналу, дзе яе чакае сустрэча з амерыканкай Ларын Дэвіс (49).

У 1/8 фіналу парнага разраду мужчынскага турніру ў катарскім г. Доха з прызавым фондам $1,3 млн беларус Ілья Івашка і расіянін Андрэй Рублёў прайгралі брытанскаму дуэту Джоні Амара / Дэніел Эванс - 7:6 (7:5), 5:7, 7:10. Заўтра ў стартавым паядынку адзіночнага разраду сапернікам Івашкі будзе нідэрландскі тэнісіст Боцік ван дэ Зандсхюлп (34). Месяц таму яны сустракаліся ў першым крузе Australian Open і тады беларус пацярпеў паражэнне.

Спаборніцтвы ў Дубаі і Досе завершацца 25 лютага.

версія для друку

зрабіць стартавай

дабавіць у выбранае