Падзеі, факты, анонсы

Беларускі хакеіст Ілья Салаўёў дэбютаваў у НХЛ

Ілья Салаўёў. Фота ХК "Дынама-Мінск"

27 кастрычніка, Мінск /Кар. БЕЛТА/. Беларускі абаронца Ілья Салаўёў правёў першы ў кар'еры матч у Нацыянальнай хакейнай лізе, паведамляе карэспандэнт БЕЛТА.

У ноч на пятніцу ў складзе "Калгары Флэймз" на матч супраць "Сент-Луіса" выйшаў 23-гадовы абаронца Ілья Салаўёў. Ураджэнец Магілёва стаў 15-м беларускім хакеістам і трэцім у бягучым сезоне, які згуляў у мацнейшай лізе планеты. Разам з Салаўёвым удзел у матчы прыняў і нападаючы "агеньчыкаў" Ягор Шаранговіч. Такім чынам, упершыню за 11 гадоў за адну каманду НХЛ згулялі два беларусы. Папярэдні раз такое здаралася ў маі 2012-га, калі за "Нэшвіл" выступалі браты Андрэй і Сяргей Касціцыны.

Нягледзячы на ўдзел адразу двух беларускіх хакеістаў, "Калгары" прайграў "Сент-Луісу" з лікам 0:3. Ілья Салаўёў правёў на лёдзе 16 з палавінай мінут і нанёс адзін кідок у створ, Ягор Шаранговіч быў на пляцоўцы крыху больш за 14 мінут і вызначыўся двума кідкамі і пяццю выйгранымі ўкідваннямі. Гэта паражэнне стала для "Флэймз" чацвёртым запар, наступны матч канадская каманда правядзе ў ноч на панядзелак супраць прынцыповых сапернікаў з "Эдмантана". Паядынак пройдзе ў рамках "Класікі спадчыны" і адбудзецца на адкрытым паветры.

версія для друку

зрабіць стартавай

дабавіць у выбранае