Трэцяя лінія метро адкрылася ў Мінску

Трэцяя лінія мінскага метро ад станцыі "Кавальская Слабада" да "Юбілейнай плошчы" адкрылася 6 лістапада. Удзел у цырымоніі ўзяў Прэзідэнт Беларусі Аляксандр Лукашэнка.

Кіраўнік дзяржавы прыбыў на станцыю "Кавальская Слабада", дзе яго сустракалі дырэктар Мінскага метрапалітэна Уладзімір Сотнікаў, генеральны дырэктар "Мінскметрабуда" Леанід Стухальскі, іншыя адказныя асобы, а таксама прадстаўнікі працоўных калектываў названых арганізацый.

Для ўдзелу ва ўрачыстай цырымоніі Аляксандр Лукашэнка спусціўся на станцыю, прайшоўшы праз турнікеты па электроннай картцы, якую яму перадалі супрацоўнікі метрапалітэна.

На новых станцыях прадугледжаны рашэнні новага тэхнічнага ўзроўню, высокая аўтаматызацыя працэсаў кіравання і кантролю інжынернага абсталявання, укаранёны інтэлектуальныя сістэмы кіравання рухам паяздоў, аплаты праезду, пажарнай бяспекі, новыя сродкі перадачы і апрацоўкі даных аб рабоце ўсіх сістэм метрапалітэна.

7 лістапада ў 12.30 чатыры новыя станцыі трэцяй лініі метро: "Кавальская Слабада", "Плошча Францішка Багушэвіча", "Вакзальная" і "Юбілейная плошча" былі адкрыты для пасажыраў.

Штодзень паслугамі метрапалітэна карыстаюцца больш за 700 тыс. пасажыраў, або трэцяя частка ўсяго пасажырапатоку Мінска. "Новая лінія павялічыць яго, злучыўшы праз цэнтр горада паўднёвыя і паўночныя раёны сталіцы", - звярнуў увагу Аляксандр Лукашэнка.

У прыватнасці, станцыя "Юбілейная плошча" з'яўляецца пераходнай са станцыяй "Фрунзенская", а з "Вакзальнай" можна трапіць на "Плошчу Леніна" і назад.