Генеральны дырэктар Беларускага тэлеграфнага агенцтва Ірына Акуловіч

"Усё самае важнае на адной платформе". Акуловіч пра асаблівасці і змест партала VIDEOBEL.BY

Асаблівасць партала VIDEOBEL.BY ў тым, што самы важны нацыянальны грамадска-палітычны кантэнт сабраны на адной платформе. Аб гэтым заявіла генеральны дырэктар Беларускага тэлеграфнага агенцтва Ірына Акуловіч на палях першага ў Беларусі форуму блогераў "БлогБай. Нам ёсць што сказаць!", які праходзіць у Нацыянальным дзіцячым тэхнапарку.

"Нам патрэбна была платформа, якую не будуць цэнзураваць па амерыканскай адмашцы. Менавіта таму і быў створаны VIDEOBEL. Па сутнасці, гэта медыяпартал, на якім прадстаўлены кантэнт вядучых беларускіх СМІ. Мы гаворым пра АНТ, БТ, СТБ, БЕЛТА, выдавецкі дом "Беларусь сегодня", "Мір" і "Першы інфармацыйны", які запусцілі 17 верасня. Пакуль мы працуем з гэтым кантэнтам", - сказала Ірына Акуловіч.

Гендырэктар БЕЛТА нагадала пра выказванне Прэзідэнта Беларусі Аляксандра Лукашэнкі: "Нам не трэба чужога, свой дабрабыт мы створым самі, сваёй працай і на сваёй зямлі".

"Для гэтага трэба працаваць разам, і для гэтага патрэбны наш уласны рэсурс. І галоўная асаблівасць VIDEOBEL у тым, што ў адным месцы можна глядзець усё самае важнае", - падкрэсліла Ірына Акуловіч.

Гендырэктарр БЕЛТА звярнула ўвагу, што партал адаптаваны пад усе платформы: тэлефон, тэлевізар, камп'ютар. "Наша задача - зрабіць партал зручным для карыстальніка. Тут і стрымы ўсіх каналаў. Можна зайсці і паглядзець іх у рэжыме рэальнага часу. Тут ёсць шортсы, праграма перадач і шмат іншага", - адзначыла яна.

Акрамя таго, дадала Ірына Акуловіч, відэа разбіваецца на тэматычныя адрэзкі. Момант таго ці іншага відэа, які цікавіць, можна знайці па таймкодзе: "Менавіта таму відэа не адразу з'яўляецца на нашым партале. Адна справа проста націснуць на кнопку і заліць відэа, і зусім іншая - сапраўды правільнае афармленне і падача".

Гаворачы аб трансляцыях праграмы перадач таго ці іншага тэлеканала, гендырэктар БЕЛТА заўважыла, што трансляцыя захоўваецца суткі. "На працягу гэтага часу вы без праблем можаце паглядзець на партале ўсё, што выходзіла на тэлеканале", - дадала яна.

Ірына Акуловіч адзначыла, што ў краіне ствараецца вялікая колькасць якаснага кантэнту, які з часам неабходна будзе размясціць на VIDEOBEL.BY. "Цяпер, працуючы невялікай камандай, мы, безумоўна, не можам размясціць тут усе відэа. Але ў бліжэйшы час гэта стане магчымым. Гэта неабходна рабіць, таму што наша задача - каб кантэнт, які ствараецца на карысць Беларусі, знаходзіўся на нашых серверах, побач з намі", - рэзюмавала гендырэктар БЕЛТА.