Дзень горада Мінска-2023: беларускай сталіцы спаўняецца 956 гадоў

Мерапрыемствы, прымеркаваныя да 956-годдзя беларускай сталіцы, былі аб'яднаны тэмай "Сэрца Беларусі – мой родны Мінск". Жыхароў і гасцей горада чакалі яркія дзействы. Гістарычны фестываль "Мінск старажытны" разгарнуўся ў паркавай зоне ўздоўж праспекта Пераможцаў і прадставіў знакавыя падзеі, пачынаючы з першага летапіснага згадвання – знакамітай бітвы на рацэ Нямізе ў 1067 годзе. На пляцоўцы ля Палаца спорту адбыліся Міжнародны алімпійскі дзень, а таксама квест і VII Міжнародныя спаборніцтвы "Мацнейшы пажарны-ратавальнік". Музей гісторыі горада прадставіць сумесную экспазіцыю з Музеем Заіра Азгура "Сілуэты старога Мінска", прысвечаную Паўночнаму завулку. Верхні горад прыняў рэспубліканскі фестываль нацыянальных культур, што аб'яднаў прадстаўнікоў больш як 20 дыяспар, якія пражываюць у Беларусі. Госці свята змаглі атрымаць асалоду ад музыкі, пакаштаваць нацыянальныя стравы і прыняць удзел у танцавальных майстар-класах.