Беларускі выйгралі камандны турнір па сучасным пяцібор'і

На базе Беларускага дзяржаўнага ўніверсітэта фізічнай культуры 10 жніўня прадоўжыліся спаборніцтвы па сучасным пяцібор'і ІІ Гульняў краін СНД. 

Спаборніцтвы ў гэтым відзе спорту праходзяць у дысцыпліне чатырохбор'е (без канкура), удзел у турніры прымаюць спартсмены не старэйшыя за 19 гадоў. Першы з двух суботніх камплектаў узнагарод быў разыграны ў жаночай эстафеце. Пасля фехтавання і плавання найбольшую суму ачкоў мелі дзяўчаты з Казахстана, каманда Беларусі ў складзе Марыі Гнедчык і Міры Бурай выходзіла на старт лазер-рана з чацвёртай пазіцыі, адстаючы на паўмінуты. Аднак на дыстанцыі беларускі нівеліравалі гандыкап і ў выніку фінішавалі на першай пазіцыі з 20-секундным адрывам. Такім чынам, Марыя Гнедчык стала ўжо трохразовай чэмпіёнкай ІІ Гульняў краін СНД, у актыве Міры Бурай два залатыя медалі і сярэбраны.