Пяты этап Кубка Садружнасці па біятлоне ў Раўбічах

Пяты этап Кубка Садружнасці па біятлоне сабраў 26-28 студзеня у беларускіх "Раўбічах" мацнейшых беларускіх і расійскіх спартсменаў.

Праграму этапу адкрыла мужчынская спрынтарская гонка. Лідар агульнага заліку турніру беларус Антон Смольскі дапусціў на двух агнявых рубяжах адзін промах і ў выніку ўступіў пераможцу гонкі Эдуарду Латыпаву з Расіі 17,2 сек. Доўгі час рэзультат Смольскага быў на фінішы другім, аднак расіянін Данііл Серахвостаў пазней перамясціў Антона на трэцяе месца, апярэдзіўшы беларуса менш як на секунду.

Трохразовы прызёр мінулага этапу Дзмітрый Лазоўскі абышоўся без памылак на стральбе і ў выніку заняў чацвёртае месца. Лепшы асабісты рэзультат на Кубку Садружнасці паказаў беларус Сцяпан Данілаў, які з "0+0" заняў 7-ю пазіцыю. Максім Варабей стаў 11-м, Іван Тулацін – 13-ы, Аляксандр Кошын – 15-ы, Мікіта Лабастаў – 24-ы, Раман Ялётнаў – 25-ы, Ілья Аўсеенка – 29-ы, Павел Бялько – 32-і. Усяго на старт гонкі выйшлі 33 спартсмены.

Турнір прадоўжыўся спрынтам у жанчын, у якім на подыум турніру паднялася Дзінара Алімбекава-Смольская. Пасля другога агнявога рубяжа беларуска, якая не дапусціла ніводнай памылкі, апярэджвала бліжэйшую з саперніц на 14 секунд. Аднак па ходзе апошняга круга перавагі Дзінара пазбавілася і ў выніку на фінішы Алімбекава-Смольская аказалася другой, уступіўшы тры секунды расіянцы Ірыне Казакевіч. Трэці час дня паказала Тамара Дзербушава.

У суботу прайшлі яшчэ дзве гонкі праследавання, а завершыліся спаборніцтвы мужчынскім і жаночым мас-стартамі 29 студзеня.

На фота: пераможца мужчынскай спрынтарскай гонкі на 10 км Эдуард Латыпаў (Расія)