Урачыстае адкрыццё XXXI Міжнароднага фестывалю мастацтваў "Славянскі базар у Віцебску"

Прэзідэнт Беларусі Аляксандр Лукашэнка 14 ліпеня адкрыў XXXI Міжнародны фестываль мастацтваў "Славянскі базар у Віцебску".

Прэзідэнт падзякаваў усім, хто стаяў ля вытокаў стварэння "Славянскага базару", хто ўсе гэтыя гады арганізуе свята, дорыць людзям сваю творчасць. "Мы сапраўды разам стварылі маштабны праект сусветнага ўзроўню, які аб'ядноўвае народы і культуры, дэманструе наш агульны гістарычны выбар, нашу нацыянальную годнасць", - сказаў кіраўнік дзяржавы.

Аляксандр Лукашэнка адзначыў, што "Славянскі базар" ужо даўно выйшаў за рамкі культурнага мерапрыемства і тое, што вакол яго пастаянна разгараюцца палітычныя страсці, яшчэ адно таго пацвярджэнне.

"Я ўдзячны ўсім удзельнікам фестывалю, хто смела і горда прыехаў прадставіць культуру сваёй краіны. У руках такіх, як вы, павінна быць будучыня свету. Свету, які, веру, пераадолее кінуты чалавецтву выклік на чалавечнасць! А на фестывальных пляцоўках Віцебска будуць выступаць беларусы, рускія, украінцы, прадстаўнікі многіх-многіх краін свету. Тут традыцыйна будуць гучаць разам імёны вялікіх рускіх і іншых сусветных класікаў - як павінна быць у сучасным высокаразвітым і цывілізаваным грамадстве", - заявіў Прэзідэнт.

Ён падкрэсліў, што на фестывалі зноў будуць запальвацца новыя зоркі і маленькія зорачкі, а ў сэрцы кожнага артыста будзе жыць любоў да віцебскай сцэны, да гэтага горада, да гэтых гледачоў, якія павераць у іх і падораць унікальны шанц, што адчыняе дзверы ў свет мастацтва.

"Дарагія сябры, са святам вас! Чарговы "Славянскі базар у Віцебску" адкрываю, аб'яўляю адкрытым", - сказаў кіраўнік дзяржавы.

У час цырымоніі адкрыцця фестывалю Аляксандр Лукашэнка ўручыў некалькі традыцыйных узнагарод.

Гран-пры юбілейнага XX Міжнароднага дзіцячага музычнага конкурсу "Віцебск" заваяваў беларус Елісей Касіч.

Прэміі Саюзнай дзяржавы за 2021-2022 гады ў галіне літаратуры і мастацтва прысуджаны некалькім аўтарскім калектывам: калектыву канцэртных праграм Міжнароднага фестывалю мастацтваў "Славянскі базар у Віцебску", стваральнікам Ржэўскага мемарыяла Савецкаму салдату і калектыву выдавецкага праекта "Гістарычная памяць Саюзнай дзяржавы", прысвечанага 75-годдзю агульнай Перамогі народаў Савецкага Саюза ў Вялікай Айчыннай вайне.

Спецыяльнай узнагароды Прэзідэнта Беларусі "Праз мастацтва - да міру і ўзаемаразумення" ўдастоены беларускі выканаўца Анатоль Ярмоленка і ансамбль "Сябры".

"Дарагія сябры, прыемна быць у гэтай зале. Я ўжо немалады палітык, адчуваю гэту аўру, гэту адкрытасць, шчырасць. Мяне ў гэтым плане не падманеш, вы сапраўдныя. Дзякуй вам", - сказаў Кіраўнік дзяржавы.