WorldSkills Belarus 2020 стартаваў у Мінску
Цырымонія адкрыцця IV Рэспубліканскага конкурсу прафесійнага майстэрства WorldSkills Belarus-2020 адбылася 15 верасня ў Мінску. Удзельнікі чацвёртага конкурсу прафмайстэрства сярод маладых рабочых (служачых), спецыялістаў і навучэнцаў, якія атрымліваюць прафесійна-тэхнічную, сярэднюю спецыяльную, вышэйшую адукацыю, прадэманструюць сваё майстэрства па 47 кампетэнцыях.
Конкурс пройдзе 15-18 верасня на тэрыторыі індустрыяльнага парка "Вялікі камень". "Напярэдадні праводзіліся адборы на ўзроўні навучальных устаноў, рэгіянальныя чэмпіянаты. У выніку для ўдзелу ў нацыянальным этапе сфарміраваны каманды ад кожнай вобласці. Усяго - 325 канкурсантаў. Яны прадэманструюць сваё майстэрства па 47 кампетэнцыях у галіне будаўнічых, вытворчых, інжынерных, інфармацыйных і камунікацыйных тэхналогій, транспарту і лагістыкі, сацыяльных і персанальных паслуг, творчых прафесій і модзе", - расказаў рэктар Рэспубліканскага інстытута прафесійнай адукацыі, афіцыйны дэлегат WorldSkills Belarus Валерый Галубоўскі.
Паводле яго слоў, асаблівасцю спаборніцтва з'яўляецца нарастаючая ўключанасць ВНУ. "У ліку ўдзельнікаў конкурсу ўсё больш студэнтаў устаноў вышэйшай адукацыі. У прыватнасці, амаль 40 з іх прадстаўляюць БНТУ. І гэта, вядома, супадае з арыенцірамі развіцця адукацыі і яе абнаўлення, у тым ліку для ВНУ. Размова ідзе аб фарміраванні прыкладных кваліфікацый, аб тым, што спецыялісту з вышэйшай адукацыяй неабходна мець яшчэ і навыкі, якія даюць магчымасць яму генерыраваць новыя ідэі ў інжынерных, будаўнічых і іншых напрамках, - адзначыў рэктар РІПА. - Акрамя таго, у нас прадстаўлена 5 кампетэнцый са сферы future skills - кампетэнцый будучага. Гэта акватроніка, распрацоўка мабільных дадаткаў, bim-тэхналогіі - лічбавае праектаванне будынкаў, тэхналогія прамысловага дызайну і полімеханіка і аўтаматызацыя".
У час рэспубліканскага спаборніцтва адбудзецца конкурс па асновах прафесійнай падрыхтоўкі сярод школьнікаў Junior Skills. У конкурсе таксама прымуць удзел асобы з абмежаванымі магчымасцямі па чатырох кампетэнцыях: Inclusion Skills, "Тэхналогія моды", "Вэб-дызайн", "Графічны дызайн", "Сістэмнае адміністраванне".
