Упершыню за 80 гадоў: прэм’ера спектакля "Вішнёвы сад" адбудзецца ў Гомелі

Прэм'ера спектакля "Вішнёвы сад" па п'есе А.П. Чэхава адбудзецца 11 красавіка на сцэне Гомельскага абласнога драматычнага тэатра і стане дэбютам за ўсю яго 80-гадовую гісторыю. Спектакль, зроблены пад кіраўніцтвам заслужанага артыста Расіі Зураба Нанабашвілі, абяцае "новы, свежы, сучасны погляд на класічную п'есу". Жанр пастаноўкі абазначаны як "гісторыя адной сям'і ў чатырох карцінах". 

Выбар п'есы тлумачаць яе актуальнасцю для людзей ва ўсе часы. "Пытанні, якія ў ёй гучаць, былі і застаюцца: чаму так бяздарна растрачваюць сваё жыццё людзі; чаму так легкадумна ставяцца да блізкіх; чаму так безадказна трацяць словы і жыццёвыя сілы, як быццам бы мяркуючы, што будуць жыць вечна, і будзе магчымасць пражыць жыццё начыста, нанава? Героі п'есы заслугоўваюць і жалю, і бязлітаснага смеху скрозь нябачныя свету слёзы", – адзначылі ў тэатры.

У спектаклі заняты вядучыя артысты тэатра і маладое пакаленне: Юрый Фейгін, Сяргей Лагуценка, Юрый Марціновіч, Настасся Задорына, Андрэй Шыдлоўскі, Сяргей Арцёменка, Аляксей Бычкоў, Міхаіл Грышачкін, Вера Грыцкевіч, Віталія Цішкова, Лілія Госцева, Дзмітрый Байкоў, Павел Кордзік, Павел Салаўёў, Марыя Хадзякова, Гіоргі Чантурыя. Мастак-пастаноўшчык - Таццяна Стысіна.

"Вішнёвы сад" – апошняя п'еса А.П.Чэхава, створана за год да яго смерці, напярэдадні першай рускай рэвалюцыі. Яна напоўнена прадчуваннем вялікіх перамен, што ўзрушылі ў хуткім часе Расійскую імперыю.

Упершыню "Вішнёвы сад" быў пастаўлены на сцэне Маскоўскага мастацкага тэатра ў 1904 годзе. Ролю Гаева сыграў К.С.Станіслаўскі, а вобраз Лапахіна ўвасобіў Л.М. Леанідаў, чыё імя назаўсёды звязана з гісторыяй Гомельскага абласнога драматычнага тэатра. Менавіта студэнты ДІТМа курса народнага артыста СССР Л.М.Леанідава сталі асновай трупы гомельскага тэатра ў 1939 годзе.