Навагодняе свята для выхаванцаў мінскага дзіцячага дома №7 "Сям'Я"

Прэм'ер-міністр Беларусі Сяргей Румас 23 снежня прыняў удзел у рэспубліканскай дабрачыннай акцыі"Нашы дзеці" і павіншаваў у Мінску выхаванцаў дзіцячага дома №7 "Сям'Я" з надыходзячымі святамі.

"У канцы снежня ўсе мы – дарослыя і дзеці – жывём прадчуваннем чароўнага свята. Мне вельмі прыемна знаходзіцца тут, – сказаў Сяргей Румас. – Спадзяюся, што адыходзячы 2019 год быў для вас шчаслівы. Нават калі былі нейкія непрыемныя моманты, хачу пажадаць, каб з апошнім боем курантаў яны адышлі ў нябыт".

Ён падкрэсліў, што такія мерапрыемствы па даручэнні Прэзідэнта праходзяць па ўсёй краіне, каб ні адно дзіця не было забыта і абдзелена ўвагай у пераднавагоднія дні.

Сяргей Румас выказаў асобныя словы ўдзячнасці выхавальнікам і выкладчыкам, пажадаў усім шчасця і здароўя. "Няхай здзейсняцца мары!" – сказаў Сяргей Румас. Ад імя ўрада ён уручыў кіраўніку ўстановы сертыфікат на сем планшэтных камп'ютараў. Дзеці таксама атрымалі салодкія падарункі з сімвалам 2020 года.

У дзіцячым доме для дзяцей створаны камфортныя ўмовы, яны выхоўваюцца ў дамашняй атмасферы. Тут няма груп. Дзяўчынкі і хлопчыкі розных узростаў, юнакі і дзяўчаты жывуць у сямі кватэрах - па 10 чалавек у кожнай. Пасля святочнага канцэрта прэм'ер-міністр пабываў у адной з іх, дзе ў час чаяпіцця пагутарыў з дзецьмі. Сяргею Румасу падарылі мастацкую кампазіцыю на тэму Новага года, зробленую ўласнымі рукамі. Дзяцей цікавіла, як дабіцца поспехаў у рабоце, як прэм'ер-міністр адзначае Новы год, куды ездзіць адпачываць у водпуск.

Дзіцячы дом размешчаны ў Кастрычніцкім раёне Мінска. Тут выхоўваюцца дзеці-сіроты і дзеці, якія засталіся без апекі бацькоў. Першых жыхароў тут прынялі ў жніўні 2000 года. У кватэрах ёсць прыхожая з убудаванай мэбляй, гасціная, пяць жылых пакояў з двума ложкамі, кухня. Яны аб'яднаны комплексам сацыяльна-бытавых памяшканняў: харчаблок, пральня, медыцынскі блок, бібліятэка, трэнажорная зала, швейная майстэрня, універсальная, камп'ютарная зала, сэнсарны пакой.