Беларусь памятае: маладзёжны марафон "75" адправіўся па мясцінах баявой славы

У год 75-годдзя вызвалення Беларусі ад нямецка-фашысцкіх захопнікаў Беларускі рэспубліканскі саюз моладзі, Федэрацыя прафсаюзаў і музей гісторыі Вялікай Айчыннай вайны запусцілі сумесны патрыятычны праект – "Маладзёжны марафон "75".

Са сталіцы, адкуль марафон стартаваў 11 чэрвеня, удзельнікі адправіліся па дарогах вызвалення Беларусі. Маршрут падарожжа праходзіць цераз Баранавічы, Брэст, Пружаны, Гродна, Ліду, Астравец, Маладзечна, Жодзіна, Бягомль, Віцебск, Магілёў, Гомель, Мінскую вобласць (Курган Славы) і Мінск.

У час марафону будзе працаваць мабільная экспазіцыя "Вызваленне Беларусі", а таксама пройдуць опэн-эйры "Кветкі Вялікай Перамогі" і адкрытыя дыялогі "Беларусь памятае!". У рамках акцыі яе ўдзельнікі стварылі альбом "Беларусь памятае. Родныя твары Перамогі" і палотнішча "Беларусь памятае!" у выглядзе сцяга краіны памерам 6х12 м з вышыванымі на ім імёнамі герояў вайны. Пазней палотнішча з’явіцца на вуліцах Мінска ў час ўрачыстага шэсця на Дзень Незалежнасці 3 ліпеня.

Унесці свой уклад у стварэнне альбома можа кожны малады чалавек Беларусі: на яго старонках будуць прадстаўлены расказы пра дзядоў і прадзедаў з пакалення пераможцаў, фота з сямейных архіваў. Пасля заканчэння марафону і прэзентацыі артэфактаў яны будуць перададзены ў Беларускі дзяржаўны музей гісторыі Вялікай Айчыннай вайны.