Канферэнцыя Групы падтрымкі Шаўковага шляху ПА АБСЕ ў Мінску
Сёння ў Мінску адкрываецца ІІ Міжнародная парламенцкая канферэнцыя Групы падтрымкі Шаўковага шляху Парламенцкай асамблеі АБСЕ "Адзін пояс і адзін шлях: паглыбленне супрацоўніцтва ў імя ўстойлівага развіцця і працвітання". Гаворачы аб мэце форуму, Георгій Цэрэтэлі падкрэсліў: "ПА АБСЕ гатова адкрыта абмеркаваць пагрозы, пытанні, якія хвалююць усе краіны, выгады і перспектывы". "Мы хочам скарыстацца магчымасцю і абмеркаваць, у тым ліку на вышэйшым узроўні, прыярытэты супрацоўніцтва, месца Беларусі ў ПА АБСЕ", – дадаў ён.
У аснове парадку дня канферэнцыі эканамічныя пытанні. Асаблівую ўвагу плануецца таксама ўдзяліць гуманітарнаму супрацоўніцтву, турыстычнай прывабнасці. Мерапрыемствы канферэнцыі прадоўжацца 30 красавіка. Яе ўдзельнікі наведаюць Кітайска-беларускі індустрыяльны парк "Вялікі камень", азнаёмяцца з ходам яго будаўніцтва і развіцця, сустрэнуцца з кіраўніцтвам адміністрацыі і прадстаўнікамі прадпрыемстваў-рэзідэнтаў.
Першая канферэнцыя Групы падтрымкі Шаўковага шляху ПА АБСЕ адбылася ў сакавіку 2018 года ў Азербайджане. Мэта мінскага мерапрыемства – максімальна поўна прадставіць эканамічны і інвестыцыйны патэнцыял Беларусі як важнага звяна эканамічнага пояса Шаўковага шляху. Удзельнікамі мінскай канферэнцыі стануць парламентарыі і прадстаўнікі дзелавых колаў з Аўстрыі, Азербайджана, Італіі, Кыргызстана, Манголіі, Расіі, Сербіі, Турцыі, Швейцарыі.
Група падтрымкі Шаўковага шляху створана ў 2017 годзе на 26-й штогадовай сесіі ПА АБСЕ ў Мінску. Дзейнасць групы ў рамках ПА АБСЕ накіравана на пашырэнне сфер супрацоўніцтва і ўмацаванне палітычных, эканамічных і культурных сувязей паміж дзяржавамі-ўдзельніцамі. Група адыгрывае ролю платформы, якая садзейнічае ўзаемавыгадным эканамічным і гандлёвым сувязям праз развіццё транспартных калідораў, меры па спрашчэнні перавозак і гандлёвых працэдур, садзейнічанне свабоднаму і бяспечнаму перамяшчэнню асоб, тавараў, паслуг і інвестыцый.
На фота: намеснік старшыні Палаты прадстаўнікоў Нацыянальнага сходу Баляслаў Пірштук
