Помнік "Масіў імёнаў" на тэрыторыі мемарыяльнага комплексу "Трасцянец"

У адпаведнасці з дамоўленасцямі на вышэйшым узроўні аўстрыйскім бокам пры садзейнічанні беларускіх дзяржорганаў былі забяспечаны выраб і ўстаноўка манумента "Масіў імёнаў". Аўтарам ідэі стаў аўстрыйскі архітэктар Даніэль Занвальд, а ў рэалізацыі прыняў удзел беларускі скульптар Канстанцін Касцючэнка, які з'яўляецца аўтарам кампазіцыі "Брама памяці". Састаўныя элементы помніка выраблены УП "Скульптурны камбінат". Фінансаванне ажыццёўлена са сродкаў ведамства федэральнага канцлера Аўстрыі і Нацыянальнага фонду Аўстрыі для ахвяр нацыянал-сацыялізму.

Манумент уяўляе сабой устаноўленыя на пастамент дзесяць калон, якія сімвалізуюць дзесяць эшалонаў з аўстрыйскімі яўрэямі, дэпартаванымі з Вены ў Трасцянец. На калонах імёны ахвяр (без прозвішчаў), часткова размытыя і паўсцёртыя. Устаноўлена таксама пліта з тэкстам на беларускай, рускай і нямецкай мовах: "Вечная памяць аўстрыйскім яўрэям – ахвярам нацысцкага рэжыму. Пасля многіх гадоў расісцкага праследавання і прыгнёту тысячы людзей былі дэпартаваны ў 1941-1942 гадах з Вены і былі забіты ў лагеры смерці Трасцянец пад Мінскам. Мы заўсёды будзем шанаваць іх памяць, іх імёны не будуць забыты. Аўстрыйская Рэспубліка. 2019 год". Пад назвай помніка на іўрыце выбіта слова "Помні".