СПАДЧЫНА БЕЛАРУСІ: як аднаўляюць Крэўскі і Гальшанскі замкі

Крэўскі і Гальшанскі замкі – архітэктурныя жамчужыны Гродзеншчыны, уключаныя ў дзяржаўныя праграмы захавання гістарычнай спадчыны, сёння перажываюць другое нараджэнне. Работы па кансервацыі і рэстаўрацыі тут вядуцца ўжо не першы год. Аднак з чэрвеня пасля распараджэння Прэзідэнта тэмпы паскорыліся, і да канца 2018-га ў гэтых гістарычных мясцінах сапраўды зроблена нямала.

Крэўскі замак – адзін са старэйшых у Беларусі, пабудаваных з каменю, – стагоддзе таму прыняў апошні бой, але да гэтага часу захаваўся ў разбураным стане. Таму галоўны акцэнт работ – кансервацыя і аднаўленне яго фрагментаў. Паводле слоў спецыялістаў, у 2017-м удалося завяршыць кансервацыю Княжацкай вежы, падыходзіць ужо да канца аднаўленне паўночна-заходняй сцяны. Для беражлівай рэстаўрацыі выкарыстоўваецца цэгла ручной работы з рознай ступенню абпалу, а таксама асаблівы раствор. А далей, згодна з планам, з дапамогай мясцовага каменю будуць аднаўляць бутавы мур і астатніх сцен.

Замак у Гальшанах, апеты ў знакамітым рамане Караткевіча, таксама знаходзіцца на рэстаўрацыі: тут работы вядуцца з вясны бягучага года. Плануецца аднавіць найбольш захаваную паўночную вежу і прылеглыя да яе сцены, а астатнюю частку – закансерваваць. Ужо расчышчаны падножжы (замак крыху "падрос") і абноўлены мур, сцены ўзмоцнены і атынкаваны, адноўлена кроквенная сістэма, пакладзена чарапіца і ўстаноўлены флюгер. Цяпер на чарзе – манціроўка знадворнай лесвіцы, якая аб'яднае другі і трэці ўзровень вежы, а таксама работы па ўнутранай аддзелцы вежы.

Кадры з "закулісся" рэстаўрацыйных работ і віды замкаў з вышыні птушынага палёту – у спецыяльным рэпартажы!