Асаблівасці нацыянальнага палявання: асенні сезон-2018 у лясах Беларусі

З даўніх часоў Беларусь славілася густымі, часам непраходнымі лясамі і багаццем іх насельнікаў. Яшчэ ў сярэдзіне XVI стагоддзя, у часы росквіту магутнага роду Радзівілаў, беларускі паэт Мікола Гусоўскі ў "Песні пра зубра" ўславіў прыгажосць роднай зямлі і традыцыі княжацкага палявання (бел. "ловы" і "лавітва"). Праз стагоддзі наша краіна па-ранейшаму прыцягвае паляўнічых разнастайнасцю фаўны і магчымасцю далучыцца да азартнага адпачынку. Зразумела, толькі ў дазволеныя перыяды, з выкананнем правіл і пад кантролем спецыялістаў.

Сёння паляванне не з'яўляецца атрыбутам арыстакратаў, і ў радах аматараў гэтага віду актыўнага адпачынку – каля 40 тысяч беларусаў, якія з'яўляюцца членамі Беларускага таварыства паляўнічых і рыбаловаў. Сярод іх найбольш папулярна паляванне на пушнога звера ў асенне-зімовы і водна-балотную дзічыну ў летне-асенні сезоны. Вясной карыстаецца асаблівым попытам паляванне на вадаплаўных птушак, а таксама зайца, ваўка, капытных.

А вось выбар паляўнічых-турыстаў розны: расіяне (іх больш за 80%) выбіраюць здабычу нетрафейных звяроў розных відаў, паляўнічыя з Польшчы, Аўстрыі, Германіі, Нідэрландаў прыязджаюць за такімі трафеямі, як глушэц, цецярук, воўк, лось, алень. Да таго ж гасцей цікавяць тыя віды жывёл, якія немагчыма знайсці на радзіме. У сярэднім за год Беларусь наведваюць каля 2 тысяч замежных паляўнічых – з Эстоніі, Польшчы, Германіі, Аўстрыі, Францыі, Італіі, Нідэрландаў…

З 1 кастрычніка стартаваў сезон асенняга палявання на лася, дзіка, казулю, высакароднага і плямістага аленяў, лань і муфлона. А дзякуючы павялічанаму бязвізаваму знаходжанню (да 30 дзён) многім турыстам стала яшчэ прасцей прыехаць у Беларусь у паляўнічы тур. Акрамя таго, для большай зручнасці ў некаторых гаспадарках прапануюць службовую зброю, каб замежным гасцям не трэба было везці сваё праз граніцу. Усё, што неабходна, – заключыць дагавор і арандаваць зброю на вызначаны тэрмін.

Асенні сезон загоннага палявання на капытных у Беларусі – у спецыяльным рэпартажы з Барысаўскага раёна.