"Заўсёды гатовы!" – Беларуская піянерская арганізацыя адзначае дзень нараджэння

Урачыстая цырымонія-прысвячэнне, уручэнне чырвоных гальштукаў і кранальныя словы клятвы... Больш за сто школьнікаў з усёй краіны папоўнілі рады піянераў 13 верасня – у 28-ы дзень нараджэння Беларускай рэспубліканскай піянерскай арганізацыі, якая сёння аб'ядноўвае звыш 650 тысяч піянераў і акцябрат.

Святочныя мерапрыемствы, прысвечаныя 28-годдзю самай масавай дзіцячай арганізацыі, стартавалі з ускладання кветак да помніка піянеру-герою Марату Казею. А потым больш за 100 акцябрат з розных рэгіёнаў – пераможцы і прызёры інтэлектуальна-творчай гульні "Пароль – акцябронак: тэрыторыя асаблівага прызначэння" – вымавілі ўрачыстыя словы клятвы, а вось пунсовыя гальштукі ім павязалі ветэраны Вялікай Айчыннай вайны, лідары, сябры і партнёры піянерскага руху. Прадоўжылася свята выступленнем вакальнага ансамбля "Песенька", пасля якога ў сталічнае неба ўзняліся сотні паветраных шароў. Не абышлося і без крэатыўных акцый: у час "АРТ-гадзіны" наваспечаныя піянеры змаглі адчуць сябе дызайнерамі і стварыць свае, аўтарскія лаўкі, якія ў якасці падарунка будуць уручаны абласным падраздзяленням БРПА.

Аб тым, якія яны – новыя грамадзяне "Краіны Піянерыі" – у святочным рэпартажы!