Святочныя агні запаліліся ў Мінску: галоўная ёлка краіны, светлавыя інсталяцыі і ззяючыя цэнтральныя вуліцы сталіцы
Напярэдадні любімых зімовых свят Мінск 10 снежня заззяў агнямі. У нядзелю ўвечары рознакаляровымі гірляндамі ў навагодніх матывах асвяціліся галоўныя магістралі, абнавіліся цэнтральныя плошчы горада і, вядома, зазіхацела ўбраная галоўная ёлка краіны. Дарэчы, у гэтым сезоне ілюмінацыю ўключылі раней (як правіла, гэта здаралася 15 снежня), каб падарыць жыхарам і гасцям сталіцы яшчэ больш часу ва ўтульнай атмасферы чакання ўрачыстасцей.
Па традыцыі пачаўся святочны марафон з галоўнай – 30-метровай! – ёлкі на Кастрычніцкай плошчы, а за ёю яшчэ 27 прыгожых зялёных прыгажунь па ўсім горадзе. Навагодняе дрэва каля Палаца спорту дацягнулася да адзнакі 18 метраў: асаблівасць гэтай дызайнерскай ёлкі ў тым, што яе акружае зіхатлівы шацёр, пад якім можна прагуляцца і зрабіць незвычайныя фота. Ёлка на плошчы Незалежнасці па сваёй форме адрозніваецца ад распаўсюджаных каркасных і нагадвае сапраўдную пушыстую прыгажуню з Белавежскай пушчы, якую раскошна ўкрыла залатое ўбранне. Ёлка каля Белдзяржцырка ўпрыгожана ў стылі рэтра – персанажамі савецкіх казак і мультфільмаў.
Вядома ж, абавязковае месца сустрэч і сэлфі ў пераднавагоднім вячэрнім Мінску – Кастрычніцкая плошча з галоўнай ёлкай краіны. У гэтым сезоне ў якасці саліруючых колераў яе ўбору выбраны чырвоны, зялёны, сіні, залаты, сярэбраны і снежна-белы. Разбавілі палітру адценні бірузовага, блакітнага і фіялетавага. Зялёная прыгажуня нібыта ўхутана спецыяльным палатном з больш як 20 тысяч пікселяў, а працягласць усіх гірляндаў склала 3,2 км! Дапоўнілі геаметрыю ўбрання матавыя і глянцавыя шары, разныя фрэзераваныя цацкі ў выглядзе зорак, сняжынак, васількоў, фігурных анёлаў і ледзяных крышталяў. Побач з ёлкай размясціўся гарадок з каларытных драўляных дамоў, дзе пачынаюць работу рамесныя і гандлёвыя крамы.
Чакаецца, што з 15 снежня стартуюць мерапрыемствы ў рамках Рэспубліканскай дабрачыннай акцыі "Нашы дзеці", з 23 снежня ў Палацы Рэспублікі юныя гледачы ўбачаць фантастычную казку "Машына Навагодняга часу", а таксама атрымаюць падарункі ад добрага чараўніка Дзеда Мароза. З 16 па 24 снежня на пляцоўцы каля сталічнага Палаца спорту разгорнецца выстава "Ёлкі нашага горада", дзе можна будзе ўбачыць крэатыўныя сімвалы ад прадпрыемстваў і раёнаў сталіцы.
