"Славянскі базар у Віцебску"-2019: гала-канцэрт урачыстага закрыцця
У Віцебску 15 ліпеня адбыўся гала-канцэрт урачыстага закрыцця XXVIII Міжнароднага фестывалю мастацтваў "Славянскі базар у Віцебску".
Кранальнае развітанне артыстаў і гледачоў з фестывалем было напоўнена прадчуваннем новай сустрэчы ў 2020 годзе, калі можна будзе зноў убачыць сяброў і акунуцца ў тую непаўторную атмасферу, якая пануе ў Віцебску кожны ліпень. А пакуль – афіцыйнае завяршэнне спраў: цырымонія ўзнагароджання ўладальніка Гран-пры міжнароднага конкурсу выканаўцаў эстраднай песні "Віцебск-2019" запаветнай статуэткай "Ліра". У бягучым годзе яе ўладальнікам стаў прадстаўнік Казахстана Адзільхан Макін, які заваяваў сэрцы членаў міжнароднага журы майстэрствам выканання і выдатным вакалам. На закрыцці фестывалю традыцыйна ўручаўся таксама спецыяльны прыз Прэзідэнта Беларусі "Славянская надзея". За лепшае ўвасабленне ў творах славянскай тэмы ў бягучым годзе яго таксама ўдастоены Адзільхан Макін.
На сцэну выходзілі як зусім маладыя артысты, так і тытулаваныя зоркі, якія ўжо заваявалі аўтарытэт. Многія выступалі ў дуэтах. Так, Сасо Паўліяшвілі выканаў з Інай Афанасьевай песню "Сэрца на далоні". Тамара Гвердцытэлі і Глеб Мацвяйчук пакарылі залу шлягерам "Паабяцайце мне каханне". Адно з самых яркіх уражанняў пакінула балада Hijo de la luna ў выкананні Ксеніі Дзяжнёвай і саліста Вялікага тэатра Ігара Цвірко. Моладзь у гэты вечар парадавалі Вольга Бузава, SHANGUY, Alekseev. Адзін аднаго змянялі выканаўцы з Беларусі, Расіі, Украіны, Швецыі, Італіі, Малдовы і іншых краін. Песні аб сяброўстве, каханні, сямейных каштоўнасцях кранулі ўсіх прысутных у зале.
Рада была зноў апынуцца на "Славянскім базары" народная артыстка СССР Сафія Ратару. Бурныя авацыі і доўгія чэргі паклоннікаў пацвердзілі нязменнасць пачуццяў да яе віцебскай публікі. Яшчэ адным сюрпрызам, ужо ад арганізатараў і ўсіх артыстаў, стала песня - прысвячэнне "Славянскаму базару ў Віцебску", якую можна назваць гімнам форуму. Рытмічная кампазіцыя аб фестывалі, выкананая ў фінале, нясе ў сабе ідэю адзінства ўсіх славянскіх народаў – гэты канцэрт стаў сапраўдным святам музыкі і сяброўства.
