Парламенцкія выбары ў Беларусі

12 верасня, Мінск /Кар. БЕЛТА/. Галасаванне на выбарах дэпутатаў у Беларусі праходзіла спакойна і арганізавана. Аб гэтым сёння заявіла на прэс-канферэнцыі кіраўнік місіі Парламенцкай асамблеі Савета Еўропы (ПАСЕ) па назіранні за выбарамі ў Палату прадстаўнікоў Гізела Вурм, перадае карэспандэнт БЕЛТА.

"Учора ў ходзе галасавання мы накіравалі 8 груп наглядальнікаў у Мінск і яго наваколле, а таксама ў Віцебскую вобласць. Нашы наглядальнікі адзначылі, што галасаванне праходзіла спакойна і арганізавана", - сказала Гізела Вурм.

Кіраўнік місіі адзначыла, што ў некаторых наглядальнікаў былі пытанні да працэдуры падліку галасоў. "Тым не менш выбары не зводзяцца да галасавання, а з'яўляюцца больш маштабным працэсам. Гэтыя парламенцкія выбары паказалі, што Беларусі, як еўрапейскай краіне, неабходна канкурэнтная палітычная сістэма з моцнымі партыямі для таго, каб рэалізаваць увесь дэмакратычны патэнцыял, які ёсць у народа Беларусі", - лічыць яна.