Парламенцкія выбары ў Беларусі

9 верасня, Мінск /Кар. БЕЛТА/. Маніторынгавая місія Парламенцкай асамблеі Савета Еўропы пачынае маніторынг парламенцкіх выбараў у Беларусі. Інфармацыя аб гэтым размешчана на сайце ПАСЕ, паведамляе БЕЛТА.

Дэлегацыя ПАСЕ на чале з Гізелай Вурм (Аўстрыя) будзе знаходзіцца ў Беларусі да 12 верасня. У ходзе назірання за электаральнай падзеяй місія будзе каардынаваць работу з калегамі з БДІПЧ АБСЕ і ПА АБСЕ.

Плануецца, што за час маніторынгу прадстаўнікі ПАСЕ сустрэнуцца з лідарамі і ўдзельнікамі палітычных партый, старшынёй Цэнтрвыбаркама, прадстаўнікамі грамадзянскай супольнасці і сродкаў масавай інфармацыі.

На гэты момант ад ПАСЕ для работы на выбарах акрэдытавана 19 наглядальнікаў. Выбары ў Палату прадстаўнікоў адбудуцца 11 верасня.