Парламенцкія выбары ў Беларусі

9 верасня, Мінск /Кар. БЕЛТА/. Старшыня Цэнтрвыбаркама Беларусі Лідзія Ярмошына ў эфіры праграмы "Трэба разабрацца" на тэлеканале АНТ выказала меркаванне, што бізнес і палітыку лепш не змешваць. Праграма была паказана вечарам 8 верасня, паведамляе БЕЛТА.

Пытанне, якое было зададзена старшыні ЦВК, датычылася багатых кандыдатаў у дэпутаты Палаты прадстаўнікоў, якія вылучыліся на цяперашняй кампаніі, і гатоўнасці беларускіх грамадзян аддаць свой голас на іх карысць. Наконт гэтага Лідзія Ярмошына адзначыла: "Багатыя людзі карыстаюцца павагай у грамадстве. Думаю, што бяссрэбніцтва - гэта ўжо не той шлях, які трэба дэманстраваць і рэкламаваць. Хутчэй за ўсё, голас аддадуць на карысць багатага, хоць у нас часта народ разважае, што калі ён багаты, значыць, у яго ўжо ўсё ёсць".

З іншага боку, паводле слоў старшыні ЦВК, узнікае пытанне, дзеля чаго багаты чалавек імкнецца трапіць у парламент, ён жа фактычна ідзе на даход, які будзе ў разы меншы, чым той, які ён мае, з'яўляючыся бізнесменам. Паводле яе слоў, падставы тут могуць быць розныя. Лідзія Ярмошына задалася пытаннем, ці шчыра гэты чалавек ідзе з бізнесу, якім трэба кіраваць. З вялікай доляй верагоднасці яна выказала меркаванне, што ён можа, нават з'яўляючыся дэпутатам, не пакінуць свой бізнес, па-ранейшаму ім кіраваць, у той час як падстаўнымі асобамі ў гэтай справе будуць яго жонка і дарослы сын. "Ці з'яўляецца гэта справядлівым і праўдзівым? Вядома, не. Узнікае падазрэнне: а можа, ён ідзе ў парламент, каб пазбегнуць адказнасці або, наадварот, з'яўляючыся дэпутатам, яшчэ больш выкарыстоўваць свае сувязі?" - адзначыла кіраўнік Цэнтрвыбаркама.

Пры гэтым Лідзія Ярмошына падкрэсліла, што жаданне ісці ў парламент на шкоду ўласнай справе можа быць і зусім бескарыслівым. "Чалавек можа гаварыць, што ён усё зарабіў, у яго ўсё ёсць, капітал працуе сам па сабе, а ён хоча служыць грамадству, - заўважыла яна. - Але, у прынцыпе, бізнес і палітыку, бізнес і ўладу лепш не змешваць".

Былі агучаны прыклады іншых дзяржаў, дзе пастаянна ідзе размова аб тым, што алігархі не павінны быць у парламенце, што бізнес, улада і палітыка павінны быць раздзелены, таму што калі яны злучаны, гэта ўжо карупцыя.

Выбары ў Палату прадстаўнікоў Нацыянальнага сходу Беларусі адбудуцца 11 верасня. Грамадзяне выберуць 110 дэпутатаў, якія зоймуць месцы ў новым скліканні парламента.