Парламенцкія выбары ў Беларусі

Згодна з устаноўленымі правіламі, кожны кандыдат у дэпутаты мае права на адну бясплатную публікацыю перадвыбарнай праграмы ў сталічнай або рэгіянальнай дзяржаўнай газеце (у залежнасці ад акругі, ад якой ён вылучаецца). Патрабаванні да праграмы простыя: аб'ём не можа перавышаць дзвюх машынапісных старонак (не больш як 4 тыс. знакаў з прабеламі пры камп'ютарным наборы). Аднак калі праграма не была прадастаўлена ў рэдакцыю да 21 жніўня, апублікавана на бясплатнай аснове яна ўжо не будзе.

Аднак, у кожнага кандыдата ў дэпутаты таксама ёсць права купляць у СМІ дадатковыя плошчы за грошы з уласных фінансавых фондаў, калі такія імі адкрыты. У цэлым перадвыбарная агітацыя вядзецца за кошт сродкаў выключна з асабістых фондаў, іншыя крыніцы фінансавання не дапускаюцца. Так, прэтэндэнты на месца ў Палаце прадстаўнікоў могуць таксама выпускаць лістоўкі і іншыя агітацыйныя матэрыялы, якія даюць магчымасць знаёміцца з імі выбаршчыкам.

Акрамя таго, ёсць магчымасць на бясплатнай аснове выступіць па тэлебачанні, радыё і прыняць удзел у тэледэбатах. ЦВК, напрыклад, з моманту рэгістрацыі заклікаў кандыдатаў не адмаўляцца ад удзелу ў тэледэбатах, але многія з іх гэтым правам усё ж не скарысталіся.

Выбары ў Палату прадстаўнікоў Нацыянальнага сходу Беларусі адбудуцца 11 верасня. Усяго на 110 парламенцкіх крэслаў цяпер прэтэндуе больш як 500 кандыдатаў. Іх колькасць пастаянна змяняецца з-за таго, што некаторыя здымаюцца з удзелу ў перадвыбарнай гонцы па ўласным жаданні.