Галоўныя навіны

22 сакавіка, Тбілісі /Уладзімір Мацвееў - БЕЛТА/. Дагавор аб асновах супрацоўніцтва паміж Беларуссю і Грузіяй падпісаны ў Тбілісі па выніках перагавораў лідараў дзвюх краін. Подпісы пад дакументам паставілі прэзідэнты Аляксандр Лукашэнка і Георгій Маргвелашвілі, перадае карэспандэнт БЕЛТА.

У дагаворы замацаваны намер Беларусі і Грузіі садзейнічаць умацаванню ўзаемадзеяння на ўсіх узроўнях і ва ўсіх сферах, якія ўяўляюць узаемны інтарэс.

Краіны дамовіліся аб далейшым развіцці палітычнага дыялогу, дагаворна-прававой базы двухбаковага супрацоўніцтва, узаемадзеянні ў рамках міжнародных арганізацый, у тым ліку па ключавых пытаннях глабальнай і рэгіянальнай бяспекі.

Беларусь і Грузія прадоўжаць прыкладаць сумесныя намаганні ў рамках існуючых механізмаў двухбаковага эканамічнага супрацоўніцтва ў мэтах паглыблення на ўзаемнай аснове міжгаліновага ўзаемадзеяння, умацавання эканамічных сувязей і развіцця прамых кантактаў паміж суб'ектамі гаспадарання.

Адзначаецца таксама намер заахвочваць кантакты на ўзроўні малога і сярэдняга бізнесу і рэалізацыю сумесных праектаў, развіваць супрацоўніцтва ў галіне максімальна эфектыўнага выкарыстання транзітнага патэнцыялу бакоў шляхам рэалізацыі сумесных праектаў у галіне транспарту і лагістыкі, а таксама ўдзелу ў развіцці міжнародных транзітных калідораў.

Акрамя таго, Беларусь і Грузія будуць садзейнічаць пашырэнню міжрэгіянальнага супрацоўніцтва і ўзаемадзеяння ў сферы турызму.

Дасягнуты таксама дамоўленасці па садзейнічанні пашырэнню і развіццю супрацоўніцтва па такіх напрамках, як адукацыя, культура і мастацтва, інфармацыйная сфера і маладзёжная палітыка, заахвочванні падрыхтоўкі і рэалізацыі сумесных навуковых праектаў.

Акрамя таго, у прысутнасці кіраўнікоў дзяржаў падпісаны яшчэ 10 дакументаў, накіраваных на развіццё супрацоўніцтва па канкрэтных напрамках.

У іх ліку пагадненне паміж урадамі Беларусі і Грузіі аб узаемных бязвізавых паездках грамадзян.

Заключаны мемарандум аб супрацоўніцтве паміж нацыянальнымі банкамі і мемарандум аб узаемаразуменні паміж нацыянальнымі банкамі ў галіне банкаўскага нагляду, мемарандум аб супрацоўніцтве паміж ААТ "Банк развіцця Рэспублікі Беларусь" і АТ "Партнёрскі фонд" Грузіі.

Падпісаны пратакол аб намерах паміж Міністэрствам сельскай гаспадаркі і харчавання Беларусі і Міністэрствам сельскай гаспадаркі Грузіі, праграма развіцця супрацоўніцтва ў сферы вышэйшай адукацыі, пагадненне аб супрацоўніцтве паміж Нацыянальнай бібліятэкай Беларусі і Нацыянальнай парламенцкай бібліятэкай Грузіі.

Зацверджана дарожная карта па рэалізацыі пагаднення аб супрацоўніцтве ў галіне аховы здароўя і медыцынскай навукі паміж Міністэрствам аховы здароўя Беларусі і Міністэрствам працы, аховы здароўя і сацыяльнай абароны Грузіі.

Па лініі рэгіёнаў заключаны пагадненне аб міжрэгіянальным супрацоўніцтве паміж Гомельскай вобласцю і рэгіёнам Імерэція і пагадненне аб супрацоўніцтве паміж горадам Жодзінам і горадам Руставі.