Галоўныя навіны
Кампанія "Інклюзіўная Беларусь" стартуе ў Мінску цырымоніяй пасадкі дрэва
24 кастрычніка, Мінск /Кар. БЕЛТА/. Кампанія "Інклюзіўная Беларусь: не пакідаючы нікога ўбаку ў дасягненні Мэт устойлівага развіцця" стартуе ў Мінску з урачыстай цырымоніі пасадкі дрэва, паведамілі карэспандэнту БЕЛТА ў дэпартаменце грамадскай інфармацыі ААН у Беларусі.
Цырымонія адбудзецца на тэрыторыі Лошыцкага парку 24 кастрычніка - у 71-ю гадавіну Арганізацыі Аб'яднаных Нацый. У мерапрыемстве прымуць удзел пастаянны каардынатар ААН у Беларусі Санака Самарасінха, прадстаўнікі Міністэрства замежных спраў, Мінскага гарвыканкама, дыпламатычнага корпуса.
Цэнтральнай тэмай кампаніі "Інклюзіўная Беларусь" з'яўляецца Мэта ўстойлівага развіцця нумар 10 - зніжэнне няроўнасці. Кампанія накіравана на павышэнне інфармаванасці грамадства аб бар'ерах і няроўнасці, на барацьбу з стыгматызацыяй слабаабароненых груп насельніцтва.
У гэты ж дзень у холе Палаца Рэспублікі адкрыецца выстаўка агенцтваў ААН у Беларусі. Сярод запрошаных - прадстаўнікі дзяржструктур, прыватнага сектара, грамадскіх арганізацый, слабаабароненых груп насельніцтва.
Дзень ААН завершыцца інклюзіўным канцэртам у Малой зале Палаца Рэспублікі. У ім прымуць удзел прадстаўнікі слабаабароненых груп насельніцтва, артысты, паслы добрай волі ААН у суправаджэнні Прэзідэнцкага аркестра Рэспублікі Беларусь.
версія для друку
зрабіць стартавай
дабавіць у выбранае