19 снежня, Мінск /Кар. БЕЛТА/. Беларуска Алёна Ляшкевіч стала пераможцай бою за званне чэмпіёнкі свету па муай-тай сярод прафесіяналаў у вагавой катэгорыі да 45 кг. Аб гэтым паведамляецца на сайце Міністэрства спорту і турызму Беларусі.
Бой адбыўся ў Ганконгу. Саперніцай Алёны Ляшкевіч стала спартсменка Гандзі Ву з Кітая.
Трэнер нацыянальнай каманды Беларусі па ўсходніх відах адзінаборстваў Міхаіл Сцяпанаў расказаў, што Алёна Ляшкевіч правяла ўвесь бой упэўнена, напорыста і агрэсіўна. Гэта ацанілі суддзі, таму аднагалосна аддалі беларусцы перавагу.
Раней Алёна Ляшкевіч станавілася чэмпіёнкай Еўропы і свету сярод аматараў.
Між тым некалькі дзён таму стала вядома, што Міжнародны алімпійскі камітэт (МАК) абвясціў сваё рашэнне прызнаць муай-тай на тры гады алімпійскім відам спорту. Далей будзе разглядацца пытанне, ці ўключаць муай-тай у праграму Алімпійскіх гульняў.