Навіны чэмпіянату свету па хакеі-2021 у Мінску і Рызе
Беларусь і Латвія арганізуюць у 2021 годзе адзін з лепшых чэмпіянатаў свету па хакеі - Лукашэнка
4 студзеня, Мінск /Кар. БЕЛТА/. Беларусь і Латвія арганізуюць у 2021 годзе адзін з лепшых чэмпіянатаў свету па хакеі. Аб гэтым Прэзідэнт Беларусі Аляксандр Лукашэнка заявіў 4 студзеня на сустрэчы з прэзідэнтам Міжнароднай федэрацыі хакея (IIHF) Рэнэ Фазелем, перадае карэспандэнт БЕЛТА.
"Я вельмі ўдзячны Міжнароднай федэрацыі і асабіста прэзідэнту за тое, што вы падтрымалі гэты чэмпіянат свету ў Беларусі і Латвіі. Вы можаце не сумнявацца: мы разам з нашымі суседзямі на дастойным узроўні правядзём гэты чэмпіянат. Гэта будзе адзін з лепшых чэмпіянатаў свету. Я вам гэта цвёрда абяцаю", - заявіў Аляксандр Лукашэнка.
Прэзідэнт падзякаваў Рэнэ Фазелю за прыезд у Мінск на Калядны міжнародны турнір аматараў хакея. Паводле слоў кіраўніка дзяржавы, гэтыя спаборніцтвы ў Беларусі прадоўжаць падтрымліваць, магчыма, павялічваючы колькасць каманд-удзельніц. "Жадаючых прыехаць велізарная колькасць. Але мы пакуль з-за розных прычын абмяжоўваемся 12 камандамі. Хацелася б, каб іх было больш, - сказаў ён. - Для спартсменаў гэта проста свята, калі яны сустракаюцца на лёдзе праз дзясяткі гадоў пасля таго, як пайшлі з прафесійнага спорту".
Аляксандр Лукашэнка заўважыў, што хакеісты завяршаюць кар'еру ўжо ў 30-35 гадоў, некаторыя гуляюць даўжэй. За гады, прысвечаныя спорту, яны прывыклі да апладысментаў і запоўненых арэн, дадаў ён. "У хакеі і іншых відах спорту мы прыйшлі да таго, каб прадоўжыць жыццё нашым спартсменам, асабліва "гульнявікам", таму што народ любіць гульнявыя віды спорту. Вось такая ідэя нарадзілася ў Беларусі, і мы для гэтага нямала зрабілі, - расказаў Прэзідэнт перадгісторыю стварэння Каляднага турніру. - Мэта адна - прадоўжыць жыццё спартсменам і папулярызаваць здаровы лад жыцця".
Акрамя таго, беларускія хакеісты-аматары і былыя прафесійныя спартсмены гуляюць у Начной хакейнай лізе. Для іх трэніровак у Мінску пабудавалі шматфункцыянальны спартыўны комплекс "Алімпік-Арэна" з дзвюма хакейнымі арэнамі. "У нас не хапала лёду, асабліва ў Мінску, і мы былі вымушаны пабудаваць дзве гэтыя пляцоўкі. Там цяпер вечарамі гуляе Начная хакейная ліга. Такім чынам мы для аматараў вырашылі праблему лёду", - дадаў кіраўнік дзяржавы.
Прэзідэнт таксама выказаў удзячнасць кіраўніку IIHF за падтрымку беларускага хакея. "Мы для хакея робім нямала, але тое, што адбываецца ў беларускім хакеі, задавальнення (вы цудоўна разумееце) выклікаць не можа. Але мы справу паправім", - падкрэсліў Аляксандр Лукашэнка.
Рэнэ Фазель у сваю чаргу падзяліўся ўражаннямі ад учарашняй сустрэчы каманды Прэзідэнта Беларусі са зборнай Міжнароднай федэрацыі хакея на Калядным турніры. Дружына кіраўніка дзяржавы абыграла сапернікаў з лікам 11:3. "Гэта было вельмі здорава. Вы трымаецеся на лёдзе значна лепш, чым я, таму што я ўпаў", - успомніў ён кур'ёзны выпадак з урачыстага ўкідвання. "Гэта было прафесійнае падзенне - спецыялісты гэта заўважылі", - падтрымаў жарт кіраўнік дзяржавы.
"Я рады знаходзіцца тут. Убачыць тут прадстаўнікоў 20 краін было сапраўды вельмі здорава. Гэта вельмі важна для спорту", - заявіў Рэнэ Фазель. Калядны міжнародны турнір ён назваў адным з буйнейшых аматарскіх чэмпіянатаў свету. "Вялікі дзякуй за тое, што вы робіце", - дадаў прэзідэнт IIHF.
версія для друку
зрабіць стартавай
дабавіць у выбранае