Прэзідэнцкія выбары-2015 у Беларусі
Розныя інфармпляцоўкі будуць працаваць у дзень выбараў у Беларусі
9 кастрычніка, Мінск /Кар. БЕЛТА/. Розныя інфармацыйныя пляцоўкі будуць працаваць у дзень выбараў у Беларусі. Аб гэтым паведаміла сёння на брыфінгу аб рабоце інфармацыйнага цэнтра Цэнтральнай камісіі па выбарах і правядзенні рэспубліканскіх рэферэндумаў "Выбары Прэзідэнта - 2015" кіраўнік інфацэнтра, міністр інфармацыі Лілія Ананіч, перадае карэспандэнт БЕЛТА.
Пасля адкрыцця інфацэнтра 11 кастрычніка ў 10.00 адбудзецца першая прэс-канферэнцыя кіраўніка Цэнтральнай выбарчай камісіі Лідзіі Ярмошынай. Кожныя дзве гадзіны будуць праходзіць прэс-канферэнцыі ў вялікай зале Палаца Рэспублікі. У прамежках паміж гэтымі мерапрыемствамі запланаваны круглыя сталы "Сацыялагічнае суправаджэнне выбарчай кампаніі. Адказнасць сацыёлагаў перад грамадствам" і "Беларусь у кантэксце геапалітычных рэалій", якія адбудуцца ў малой зале Палаца Рэспублікі. "Лічу, круглыя сталы выклічуць цікавую дыскусію. Час, які будзе паміж прэс-канферэнцыямі, можа быць плённа выкарыстаны журналістамі", - лічыць міністр.
У праграме работы інфацэнтра 11 кастрычніка - прамыя ўключэнні з абласнымі камісіямі па выбарах кіраўніка дзяржавы. Так, у 10.00 адбудзецца відэаканферэнцыя з Брэсцкай вобласцю, у 12.00 на сувязь выйдуць Магілёўская і Гродзенская вобласці, у 14.00 - Гомельская і Мінская, у 16.00 - Віцебская. Заключным будзе ўключэнне ў 18.00 Мінскай гарадской камісіі па выбарах Прэзідэнта.
Як адзначыла Лілія Ананіч, увага практычна ўсяго свету будзе прыцягнута да выбарчай кампаніі ў Беларусі. "Не будзе перабольшаннем сказаць, што тэма выбараў Прэзідэнта будзе на першых радках рэйтынгаў інфармпрасторы не толькі Беларусі, але і ўсяго свету. Сведчанне таго: у інфацэнтры пажадалі акрэдытавацца журналісты з 30 краін. Прадстаўнікі ўсіх буйнейшых медыя будуць працаваць у Беларусі", - сказала міністр.
Для камфортнай работы прадстаўнікоў СМІ створаны ўсе ўмовы. "Інфацэнтр мае ўсе тэхналагічныя атрыбуты, больш за 900 выдзеленых логінаў і пароляў для работы ў інтэрнэце, бясплатны Wi-Fi. І што самае празаічнае, але вельмі важнае - кубачак кавы і магчымасць працаваць як ва ўтульным крэсле, так і за рабочым сталом", сказала на заканчэнне Лілія Ананіч.
На 12 кастрычніка намечаны прэс-канферэнцыі па папярэдніх выніках прэзідэнцкай кампаніі, а таксама замежных наглядальнікаў.
версія для друку
зрабіць стартавай
дабавіць у выбранае