Прэзідэнцкія выбары-2015 у Беларусі

Мікалай Лазавік са шкадаваннем адзначыў, што не на ўсіх выбарчых участках, дзе ідзе датэрміновае галасаванне, нацыянальныя наглядальнікі знаходзяць агульную мову з членамі ўчастковых камісій. Канфліктныя сітуацыі ўзнікалі і ў Мінску, і ў рэгіёнах. "Не сакрэт, што ў нас у рэспубліцы некаторыя палітычныя арганізацыі першапачаткова паставілі сабе мэту даказаць, што выбары ў Беларусі недэмакратычныя, што няма свабоды і наогул няма выбараў. І, зразумела, наглядальнікі ад гэтых арганізацый не выконваюць тых функцый, якія нам хацелася б, каб яны выконвалі, - выяўлялі недахопы і дапамагалі іх устараняць. Яны наадварот нават, калі недахопаў няма, стараюцца неяк справакаваць канфлікт на выбарчым участку. Калі такога наглядальніка выдаляюць з выбарчага ўчастка, можна сказаць, што ён сваёй мэты дасягнуў - справакаваў канфлікт і апавясціў аб ім", - лічыць сакратар ЦВК.

Паводле яго слоў, за час датэрміновага галасавання ўжо былі зафіксаваны факты пазбаўлення наглядальнікаў акрэдытацыі. Мікалай Лазавік удакладніў, што размова ідзе аб адзінкавых выпадках, калі наглядальнікі спрабавалі патрабаваць ад членаў камісій тое, што выходзіць за рамкі іх паўнамоцтваў, і атрымлівалі адмову.

"З замежнымі наглядальнікамі ў нас больш дыпламатычныя адносіны, яны, як правіла, за рамкі сваіх паўнамоцтваў не выходзяць", - дадаў сакратар Цэнтрвыбаркама.