Прэзідэнцкія выбары-2015 у Беларусі

Кандыдат у прэзідэнты лічыць, што Беларусь мае патрэбу ў рэформах, праводзіць іх неабходна ў розных сферах - эканоміцы, сацыяльнай абароне, адукацыі, дзяржаўным кіраванні, міжнародных адносінах. "У эканоміцы трэба адначасова ажыццяўляць некалькі розных дзеянняў - спыніць рост цэн, падтрымаць прыватную ініцыятыву і тыя галіны, якія паказваюць кропкі росту, а іх дастаткова. Для прадпрыемстваў, якія з'яўляюцца датацыйнымі, сабраць каманду прафесіяналаў і скласці індывідуальны план выхаду з крызісу. І толькі пад яго даваць дзяржаўныя датацыі і шукаць інвестыцыі. Неабходна таксама стварыць спрыяльныя ўмовы для інвестыцыйнага клімату, каб нашы беларусы, у якіх ёсць выдатныя ідэі, маглі іх рэалізаваць", - сказала Таццяна Караткевіч.

Яна ўпэўнена, што ўстановы медыцыны і адукацыі павінны атрымліваць большую дзяржаўную падтрымку. "Якасць адукацыі трэба павышаць, прымаць меры, каб скараціць разрыў паміж дзіцячым садам і школай, школай і ўстановамі прафесійна-тэхнічнай і вышэйшай адукацыі", - адзначыла кандыдат. Будучыя рабочыя месцы павінны быць максімальна набліжаны да вучняў і студэнтаў.

Закранаючы тэму міжнародных адносін, Таццяна Караткевіч падкрэсліла, што асноўны прынцып "адказнае суседства", мэта - збалансаваныя міжнародныя адносіны. Беларусь - незалежная краіна ў цэнтры Еўропы і павінна захаваць сваю незалежнасць, але пры гэтым развіваць адносіны з усімі краінамі-суседкамі. "Зразумела, у нас ёсць партнёр, такі як Расія, і мы хочам прадаўжаць гэта партнёрства і дружбу, але пры гэтым хочам развіваць адносіны з ЕС і Украінай, і іншымі краінамі, быць больш адкрытымі ў міжнародных сувязях", - дадала яна.