Прэзідэнцкія выбары-2015 у Беларусі

22 ліпеня, Мінск /Таццяна Пастушэнка - БЕЛТА/. У Вене з вялікім інтарэсам паставіліся да беларускага вопыту па выкананні рэкамендацый АБСЕ і падрыхтоўцы выбараў Прэзідэнта. Аб гэтым паведаміла карэспандэнту БЕЛТА старшыня Цэнтрвыбаркама Беларусі Лідзія Ярмошына па выніках удзелу ў праведзеным семінары АБСЕ па электаральнай праблематыцы.

Лідзія Ярмошына ўдакладніла, што такі семінар, у якім яна таксама прымала ўдзел, праходзіў тры гады таму напярэдадні парламенцкіх выбараў у Беларусі. "На гэты раз толькі двум старшыням ЦВК з краін былога Савецкага Саюза - мне і старшыні Цэнтрвыбаркама Расіі Чураву (Уладзіміру Чураву. - Заўвага БЕЛТА) - была прадастаўлена магчымасць выступіць з дакладам у ходзе сесійнага пасяджэння. У прынцыпе, на гэтым семінары абмяркоўваліся пытанні ўсеагульнага выбарчага права і выканання ўдзельнікамі краін АБСЕ міжнародных выбарчых стандартаў. Я сказала б, што беларускі вопыт выканання рэкамендацый АБСЕ і праблемы падрыхтоўкі выбараў Прэзідэнта Беларусі былі выслуханы з вялікай увагай і інтарэсам", - адзначыла яна.

Паводле слоў старшыні ЦВК, лейтматывам яе даклада на семінары ў Вене стала думка аб тым, што інстытут міжнародных наглядальнікаў не павінен выкарыстоўвацца для націску на дзяржавы, якія праводзяць незалежную палітыку. "Інстытут міжнародных наглядальнікаў за выбарамі не павінен выкарыстоўвацца для націску на дзяржавы, якія праводзяць незалежную палітыку, пры ўмове выканання абавязацельстваў, накіраваных на захаванне міру і бяспекі. Наглядальнікам пры ацэнцы выбараў трэба ўлічваць нацыянальнае заканадаўства. Гэта адно з палажэнняў майго даклада", - заўважыла Лідзія Ярмошына.

Акрамя таго, ішла размова аб тым, якія карэкціроўкі знайшлі адлюстраванне ў беларускім заканадаўстве, якія змяненні ўлічаны ў частцы фарміравання выбарчых камісій, павышэння фінансавай незалежнасці кандыдатаў, паляпшэння інфармаванасці выбаршчыкаў, прадастаўлення дадатковых гарантый для галасавання грамадзянам са слабым зрокам або сляпым і г.д.