Усебеларускі народны сход

УНС будзе садзейнічаць вырашэнню існуючых у грамадстве пытанняў - дэлегат

Фота з архiва

14 студзеня, Брэст /Кар. БЕЛТА/. Правядзенне Усебеларускага народнага сходу будзе садзейнічаць вырашэнню існуючых у грамадстве пытанняў. Такое меркаванне выказаў карэспандэнту БЕЛТА дэлегат УНС, дацэнт кафедры паліталогіі і сацыялогіі Брэсцкага дзяржаўнага ўніверсітэта імя А.С. Пушкіна, кандыдат палітычных навук Эдуард Севярын.

"Гэта важнае мерапрыемства, якое будзе садзейнічаць вырашэнню шэрага існуючых у грамадстве пытанняў - пачынаючы ад палітыкі і заканчваючы сацыяльнай сферай", - адзначыў палітолаг.

Адно з ключавых пытанняў, на яго думку, - канстытуцыйнае рэфармаванне. "Канстытуцыйная рэформа - не імгненнае дзеянне. Тым не менш нейкія канкрэтныя прынцыпы рэфармавання павінны быць абазначаны ў рамках УНС. Безумоўна, мы павінны падвесці пэўныя вынікі і зрабіць вывады па этапах развіцця за апошні перыяд часу. Мы таксама павінны вызначыць напрамкі развіцця беларускай эканомікі - з улікам таго, што мы пазіцыянуем сябе як сацыяльна-прававая дзяржава", - дапоўніў Эдуард Севярын.

У якасці дэлегата VI Усебеларускага народнага сходу ён вылучаны абласной арганізацыяй прафсаюза работнікаў адукацыі і навукі. На дыскусійнай пляцоўцы форуму прадстаўнік рэгіянальнай навукі плануе таксама абмеркаваць з калегамі пытанні эфектыўнага функцыянавання і развіцця сістэмы адукацыі. Адным з актуальных, на яго думку, стане пытанне лічбавізацыі адукацыі, узровень якой неабходна павышаць.

"Безумоўна, важны і напрацоўкі, якія існуюць у рамках Балонскага працэсу. З іншага боку, трэба разумець, што тыя механізмы, якія дзейнічаюць на іншых тэрыторыях, не заўсёды будуць эфектыўнымі ў нашай адукацыйнай прасторы. Таму мы павінны знайсці ўласны варыянт развіцця беларускай сістэмы адукацыі з улікам перадавых дасягненняў, якія існуюць у свеце, і сваёй гістарычнай спадчыны", - падкрэсліў дацэнт Брэсцкага ўніверсітэта.

Ён адзначыў, што вырашыць абсалютна ўсе пытанні, якія хвалююць грамадства, у рамках аднаго сходу, няхай і Усебеларускага, нерэальна. Важна абазначыць асноўныя прынцыпы і напрамкі паступальнага руху наперад.

версія для друку

зрабіць стартавай

дабавіць у выбранае