70-годдзе Вялікай Перамогі

19 мая, Гродна /Алена Стасюкевіч - БЕЛТА/. Фотавыстаўка БЕЛТА "Перамога - адна на ўсіх" дае магчымасць паглядзець на праўду вайны. Такое меркаванне сёння на ўрачыстым адкрыцці выстаўкі ў Гродне выказаў генеральны дырэктар Беларускага тэлеграфнага агенцтва Дзмітрый Жук, перадае карэспандэнт БЕЛТА.

У рамках рэспубліканскага патрыятычнага праекта "Кветкі Вялікай Перамогі" выстаўка падарожнічае па абласных цэнтрах, каб прадставіць рэальныя моманты вайны і Перамогі. Старэйшае інфармацыйнае агенцтва Беларусі мае багаты архіў і ў час такіх экспазіцый дае магчымасць азнаёміцца з рэдкімі кадрамі ваеннага жыцця маладому пакаленню.

"Маючы такі архіў, у год 70-годдзя Перамогі заставацца ўбаку нам было немагчыма, - сказаў Дзмітрый Жук. - Гісторыю перапісваюць і будуць перапісваць, толькі гэтыя фатаграфіі ўжо не перарабіць". Гендырэктар падкрэсліў, што сёння шмат гавораць аб гераізме. Але вайна ў першую чаргу - гэта жах, страх, разруха. "Усе ведаюць выказванне аб тым, што народ, які не помніць сваёй гісторыі, дапускае новую вайну. Мы не маем права забываць аб гэтым. Спадзяюся, фотавыстаўкі дадуць магчымасць малодшаму пакаленню крыху па-іншаму паглядзець на тое, што яны ўжо ведаюць", - адзначыў гендырэктар.

Намеснік старшыні аблвыканкама Віктар Лісковіч дадаў, што фатаграфіі на выстаўцы з'яўляюцца аб'ектыўным пацвярджэннем фактаў аб вайне. Убачыць іх і яшчэ раз ацаніць подзвіг сваіх дзядоў павінна максімальная колькасць моладзі, сказаў ён. Звяртаючыся да школьнікаў на адкрыцці выстаўкі, намеснік старшыні аблвыканкама папрасіў іх цаніць і помніць подзвіг ветэранаў. Яны паказалі нам урок аб тым, што проста так нічога не даецца.

Ва ўрачыстасці ў абласным драматычным тэатры прынялі ўдзел кіраўніцтва Гродзенскага аблвыканкама, прадстаўнікі ААТ "ААБ Беларусбанк", ветэраны, школьнікі. Гучалі мелодыі ваенных гадоў у выкананні юных артыстаў.

Выстаўка БЕЛТА ў Гродне ўключае амаль 50 фотаздымкаў. У экспазіцыі прадстаўлены рарытэтныя чорна-белыя фатаграфіі з архіва інфармацыйнага агенцтва, у тым ліку вядомых ваенных карэспандэнтаў, і малавядомыя кадры, а таксама лічбавыя каляровыя фотаработы цяперашніх супрацоўнікаў Беларускага тэлеграфнага агенцтва. Выстаўка "Перамога - адна на ўсіх" паказвае аўтарскі погляд праз аб'ектыў фотакамеры на розныя бакі і перыяды вайны (франтавыя баі, работа ў тыле, партызанская і падпольная барацьба, пакуты мірнага насельніцтва). Значная частка фотаздымкаў прысвечана тэме вызвалення абласных гарадоў, перыяду пасляваеннага аднаўлення.

Старт фотавыстаўкі "Перамога - адна на ўсіх" быў дадзены 11 сакавіка 2015 года ў Гомелі. Экспазіцыя пабывала ўжо ў Магілёве, Гомелі, Віцебску і Мінску. У Гродне азнаёміцца з работамі вядучых фотакарэспандэнтаў розных гадоў можна ў фае абласнога драматычнага тэатра да 26 мая.