70-годдзе Вялікай Перамогі

22 чэрвеня, Брэст /Святлана Вячорка - БЕЛТА/. Мітынг-рэквіем, прысвечаны 74-й гадавіне пачатку Вялікай Айчыннай вайны, адбыўся ў мемарыяльным комплексе "Брэсцкая крэпасць-герой", перадае карэспандэнт БЕЛТА.

Жалобная цырымонія па традыцыі пачалася ў 4 гадзіны раніцы. Да гэтага ўсе яе ўдзельнікі прайшлі своеасаблівай дарогай у мінулае. На працягу ўсяго шляху ад увахода ў мемарыял "Зорка" да плошчы Цырыманіялаў рэканструктары ўзнаўлялі эпізоды апошняга мірнага вечара ў цытадэлі над Бугам. Гледачы маглі паназіраць за артылерыйскай пазіцыяй, трэніроўкамі "варашылаўскіх стралкоў" і секцыі Асаавіяхім, танцамі пад патэфон у салдацкім клубе, бытам ваеннаслужачых у казарме і сталовай. На экранах дэманстраваліся кадры даваеннай хронікі.

Гэтай дарогай у мінулае разам з брастаўчанамі сёння прайшлі і шматлікія госці горада, якія прыбылі сюды спецыяльна ў Дзень усенароднай памяці ахвяр Вялікай Айчыннай вайны. Паводле папярэдніх даных, гэтай раніцай у Брэсцкай крэпасці сабраліся амаль 12 тыс. чалавек.

Да памятнай даты прымеркаваў свой візіт у Беларусь Патрыярх Маскоўскі і ўсяе Русі Кірыл. У Мікалаеўскім гарнізонным храме крэпасці ён адслужыў кароткую памінальную літыю па загінулых воінах, потым прыняў удзел у мітынгу-рэквіеме на пляцоўцы Цырыманіялаў.

Эмацыянальнае палатно мітынгу-рэквіема было саткана з яркіх сцэн і кранальных момантаў. Гучала музыка, артысты выконвалі песні і чыталі вершы, выпускалі ў неба белыя шары і галубоў. Пагранічнікі па традыцыі спусцілі на воды Буга вянкі са свечкамі, запаленымі ад Вечнага агню мемарыяла. Адначасова гірлянды з кветак былі ўскладзены да пліт некропаля. Вянкі да Вечнага агню ўсклалі старшыня Брэсцкага аблвыканкама Анатоль Ліс і Патрыярх Маскоўскі і ўсяе Русі Кірыл. Мінуту маўчання на плошчы мемарыяла разрадзілі залпы ружэйнага салюту.

Звяртаючыся да ўдзельнікаў мітынгу-рэквіема, Анатоль Ліс адзначыў, што памяць аб ваенных падзеях з'яўляецца сапраўды ўсенароднай і не мае нацыянальных і дзяржаўных граніц. Пацвярджэнне гэтага - тысячы людзей, якія штогод прыязджаюць у Брэсцкую крэпасць з розных краін, каб аддаць даніну павагі загінулым героям. Вялікі гонар для ўсіх, што гэты Дзень памяці і смутку з прысутнымі раздзяляе Свяцейшы Патрыярх Маскоўскі і ўсяе Русі Кірыл.

"Ваш візіт на Брэстчыну мае вялікае значэнне. Ён служыць аб'яднанню людзей, напаўняе памяць аб падзеях Вялікай Айчыннай вайны яшчэ большым маральным сэнсам. Вялікая Айчынная вайна паказала, што толькі той народ непераможны, які гатовы змагацца за сваю зямлю да канца, як гэта рабілі нашы бацькі і дзяды. Сёння, аналізуючы ўрокі той вайны, мы робім галоўны вывад: неабходна выключыць вайну як сродак вырашэння супярэчнасцей", - сказаў кіраўнік рэгіёна.

Са словамі падзякі губернатар звярнуўся да ветэранаў, пажадаў ім здароўя і даўгалецця, а моладзі - вучыцца ў іх стойкасці, мужнасці і вернасці Радзіме. "Жадаю ўсім, каб неба над нашай зямлёй заўсёды было мірным, а Брэсцкая крэпасць заставалася месцам памяці аб гераізме, славе і велічы атрыманай перамогі", - рэзюмаваў кіраўнік Брэсцкай вобласці.

Пасля мітынгу Анатоль Ліс і патрыярх Кірыл падышлі для кароткай гутаркі з ветэранамі. Потым прадстаяцель РПЦ наведаў музей абароны Брэсцкай крэпасці, пасля чаго накіраваўся ў Брэсцкі аэрапорт, адкуль спецрэйсам вылецеў у Маскву.