II Еўрапейскія гульні ў Беларусі

8 студзеня, Мінск /Кар. БЕЛТА/. У Міністэрстве інфармацыі Беларусі адбылося пашыранае пасяджэнне падкамітэта па пытаннях інфармацыйна-рэкламнага забеспячэння і работы СМІ рэспубліканскага аргкамітэта па падрыхтоўцы і правядзенні Еўрагульняў-2019, паведамілі БЕЛТА ў Мінінфарме.

Пасяджэнне прайшло пад старшынствам міністра інфармацыі Аляксандра Карлюкевіча. Былі разгледжаны пытанні актывізацыі інфармацыйнага забеспячэння падрыхтоўкі і правядзення ІІ Еўрапейскіх гульняў у Мінску; рэалізацыі праграмы ўключэння жыхароў Беларусі ў мерапрыемствы, звязаныя з падрыхтоўкай і правядзеннем Еўрагульняў; арганізацыі і забеспячэння работы прэс-цэнтраў, якія размяшчаюцца ў спартыўных аб'ектах, дзе будуць праходзіць спаборніцтвы, а таксама даведачна-інфармацыйнай службы для акрэдытаваных журналістаў.

Па выніках мерапрыемства дадзены адпаведныя даручэнні органам дзяржкіравання і арганізацыям па актывізацыі асвятлення ІІ Еўрагульняў, у тым ліку за мяжой.

У пасяджэнні прынялі ўдзел прадстаўнікі вядучых рэспубліканскіх СМІ, Нацыянальнага алімпійскага камітэта, дырэкцыі Еўрагульняў, а таксама шэрага міністэрстваў і ведамстваў.