II Еўрапейскія гульні ў Беларусі

4 красавіка, Мінск /Кар. БЕЛТА/. Турыстычная інфраструктура Беларусі будзе поўнасцю гатова да прыёму гасцей II Еўрапейскіх гульняў, якія пройдуць у краіне ў 2019 годзе. Аб гэтым заявіў сёння журналістам міністр спорту і турызму Беларусі Сяргей Кавальчук на міжнародным вясеннім кірмашы турыстычных паслуг "Адпачынак-2018", перадае карэспандэнт БЕЛТА.

"Напярэдадні такога вялікага спартыўнага мерапрыемства мы павінны паглядзець гатоўнасць у тым ліку нашай турыстычнай галіны бізнесу, што можам прапанаваць людзям, якія прыедуць да нас у наступным годзе", - адзначыў Сяргей Кавальчук.

Міністр звярнуў увагу, што госці II Еўрапейскіх гульняў будуць наведваць не толькі спартыўныя спаборніцтвы, але і захочуць пазнаёміцца з турыстычнымі магчымасцямі Беларусі. Паводле яго слоў, да старту гульняў яшчэ ёсць час, каб падрыхтавацца да прыёму замежных турыстаў. "Мы павінны зрабіць так, каб на дастойным узроўні маглі паказаць у кожным кутку краіны нашу культуру, прыгажосць беларускай прыроды", - дадаў ён.

II Еўрапейскія гульні пройдуць у Мінску з 21 па 30 чэрвеня 2019 года ў 15 відах спорту. Атлеты разыграюць 206 камплектаў медалёў у 23 дысцыплінах. Спаборніцтвы будуць арганізаваны на 12 спартыўных пляцоўках. На Гульні плануецца прыбыццё амаль 4 тыс. спартсменаў, 2 тыс. трэнераў і іншых прадстаўнікоў афіцыйных дэлегацый з 50 еўрапейскіх нацыянальных алімпійскіх камітэтаў. Акрамя таго, у Беларусь прыедуць прыкладна 650 міжнародных і 410 нацыянальных спартыўных суддзяў, каля 1 тыс. замежных прадстаўнікоў СМІ, кіраўнікі еўрапейскіх спартыўных федэрацый і ведамстваў, прадстаўнікі штаб-кватэры ЕАК, кіраўнікі еўрапейскіх НАК, а таксама высокія службовыя асобы.