II Еўрапейскія гульні ў Беларусі

3 жніўня, Мінск /Кар. БЕЛТА/. Спартыўны талісман павінен сімвалізаваць краіну і радаваць людзей. Такое меркаванне выказала карэспандэнту БЕЛТА член выканкама Нацыянальнага алімпійскага камітэта Беларусі, вядомая гімнастка Любоў Чаркашына.

"Спартыўны талісман павінен сімвалізаваць краіну і ў той жа час радаваць людзей усіх узростаў. Трэба абыграць штосьці цікавае і вясёлае. У многіх людзей у свеце Беларусь асацыіруецца з бульбай. Як варыянт, гэта можна выкарыстоўваць пры распрацоўцы талісмана", - расказала Любоў Чаркашына. Паводле слоў гімнасткі, "калі мы хочам паказаць культуру Беларусі праз талісман, то трэба дэталёва падыходзіць да яго распрацоўкі". Любоў Чаркашына сказала, што купальскія вянкі з нацыянальнай сімволікай былі б цікавымі сувенірамі.

Паўдзельнічаць у адкрытым рэспубліканскім конкурсе па распрацоўцы талісмана II Еўрапейскіх гульняў можа любы жадаючы. Заяўкі прымаюцца да 15 лістапада 2017 года. Усё што трэба - прапанаваць ідэю талісмана, выяву і імя. Талісман павінен адпавядаць алімпійскім каштоўнасцям і слогану Bright Year, Bright You ("Яркі год, яркі ты"). З падрабязнасцямі правядзення конкурсу можна азнаёміцца на сайтах Міністэрства інфармацыі, Нацыянальнага алімпійскага камітэта Беларусі і БЕЛТА. Уладальнікі трох прызавых месц атрымаюць запрашальныя білеты на мерапрыемствы II Еўрапейскіх гульняў, а таксама камплекты парадна-спартыўнай экіпіроўкі нацыянальнай зборнай Беларусі.-0-