II Еўрапейскія гульні ў Беларусі

13 ліпеня, Мінск /Кар. БЕЛТА/. Лагатып Еўрапейскіх гульняў - 2019 прадуманы і лёгкі. Такое меркаванне выказаў карэспандэнту БЕЛТА старшыня Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Беларусі Ігар Марзалюк.

Як адзначыў дэпутат, у лагатыпе выкарыстана нацыянальная легенда пра папараць-кветку, знайсці якую азначае здабыць шчасце. "Гэта яшчэ і своеасаблівы факел, які прывядзе атлета да перамогі. У цэлым лагатып выглядае лёгка і ярка", - лічыць Ігар Марзалюк.

Лагатып ІІ Еўрапейскіх гульняў быў прадстаўлены ў Мінску 7 ліпеня.

Беларусь атрымала права правядзення II Еўрапейскіх гульняў на 45-м пасяджэнні Генеральнай асамблеі Еўрапейскіх алімпійскіх камітэтаў, якое ў кастрычніку 2016 года адбылося ў Мінску. Афіцыйным дэвізам II Еўрагульняў будзе выказванне Bright Year, Bright You ("Яркі год, яркі ты"). Таксама будзе руская варыяцыя лозунга - "Время ярких побед" і беларуская - "Час яскравых перамог". Цяпер у Беларусі аб'яўлены адкрыты рэспубліканскі конкурс на распрацоўку талісмана Еўрагульняў-2019. Прыняць у ім удзел можа любы жадаючы. Трэба прапанаваць ідэю талісмана, выяву і імя. Талісман павінен адпавядаць алімпійскім каштоўнасцям і слогану Bright Year, Bright You. Заяўкі прымаюцца да 15 лістапада 2017 года.