II Еўрапейскія гульні ў Беларусі

30 сакавіка, Іўеўскі раён /Кар. БЕЛТА/. Прэм'ер-міністр Андрэй Кабякоў даручыў завяршыць рэканструкцыю трасы М6 Мінск - Гродна - граніца Рэспублікі Беларусь (Брузгі) да II Еўрапейскіх гульняў, якія пройдуць у нашай краіне ў 2019 годзе. Такое даручэнне ён даў сёння ў час рабочай паездкі ў Гродзенскую вобласць, перадае карэспандэнт БЕЛТА.

"Ёсць графік работ, да Еўрапейскіх гульняў дарога павінна быць у ідэальным стане, - падкрэсліў Андрэй Кабякоў. - І да гэтага часу ўздоўж трасы павінны быць і аб'екты прыдарожнага сэрвісу".

Міністр транспарту і камунікацый Анатоль Сівак паведаміў, што работы па рэканструкцыі павінны завяршыцца да канца 2018 года. "З-за ўмоў надвор'я сакавік заўсёды быў для дарожнікаў непаўнацэнным рабочым месяцам, але ўжо ў красавіку ў графіку з'яўляюцца работы, звязаныя з асфальтам, земляным палатном. У гэтым годзе мы на аб'екце цалкам адкрыем рух", - запэўніў ён.

У ходзе рэканструкцыі на раздзяляльнай паласе М6 устанаўліваюцца бетонныя агароджы - маналітныя і зборныя. "Тут ёсць плюсы ў плане бяспекі. У плане эксплуатацыі бетонныя больш складаныя, чым металічныя агароджы, якія прымяняліся на раздзяляльнай паласе раней. Але мы ўсё гэта ўзважылі, улічылі розны вопыт і прынялі рашэнне на карысць бетонных", - расказаў Анатоль Сівак.

"У выпадку маналітнага важна якасць бетону, каб агароджа магла даволі доўга служыць і не разбурацца ад тэмпературных і іншых уздзеянняў, напрыклад, рэагентаў, якімі пасыпаюць дарогі. Мы пайшлі на ўстаноўку такіх агароджаў і бачым, што ў частцы бяспекі ёсць плюсы", - адзначыў міністр.

Праект па рэканструкцыі аўтадарогі М6 рэалізуецца за кошт сродкаў Сусветнага банка. Агульная сума пазыкі - $250 млн. Цяпер ідзе другі этап рэканструкцыі на ўчастку працягласцю 67,3 км.