Падзеі, факты, анонсы

7 ліпеня, Віцебск /Кацярына Князева - БЕЛТА/. Фонды музея Марка Шагала ў Віцебску ў дзень нараджэння мастака папоўніліся 20 работамі вядомых майстроў пэндзля з 4 краін - удзельнікаў III Міжнароднага Шагалаўскага пленэру, паведаміла карэспандэнту БЕЛТА дырэктар музея Ірына Воранава.

"Удзельнікамі пленэру сталі 10 прызнаных мастакоў з Беларусі, Расіі, Латвіі і Германіі. У выніку ў фонды музея Марка Шагала паступае 20 работ - па 2 работы ад кожнага ўдзельніка. Такой была галоўная ўмова пленэру. Мы ніяк не абмяжоўвалі майстроў у выбары тэмы, яны стваралі так, як лічылі патрэбным. Для нас самае важнае, што адбылася сустрэча, абмен вопытам. І па прадстаўленых работах відаць, што мастакі "надыхаліся" Віцебскам. Але гэта толькі іх першыя ўражанні", - адзначыла Ірына Воранава. Яна растлумачыла, што пленэр можна параўнаць са зборам вінаграду, якому яшчэ давядзецца брадзіць, пакуль ён не ператворыцца ў вытанчанае віно. Гэтак і для мастакоў праведзены ў Віцебску час стане доўгаграючай крыніцай натхнення.

Таксама Ірына Воранава выказала вялікую надзею, што трэці па ліку пленэр, які адбыўся пасля 19-гадовага перапынку, стане не толькі не апошнім, але і паслужыць штуршком для рэгулярнага яго правядзення раз у два гады. "Ёсць сэнс чаргаваць Шагалаўскія чытанні, якія з мінулага года сталі біенале, і пленэры", - растлумачыла дырэктар музея.

Сёння з Арт-цэнтры Марка Шагала адбылося адкрыццё выстаўкі па выніках III Міжнароднага Шагалаўскага пленэру. На працягу 12 дзён запрошаныя мастакі працавалі ў прадастаўленых ім майстэрнях у Арт-прасторы на Талстога, 7. Акрамя таго, на пленэры госці з блізкага і далёкага замежжа наведалі мясціны, звязаныя з імем знакамітага віцебскага мастака, - Лёзна, Любавічы, Дом-музей Марка Шагала, пабывалі на экскурсіі ў Музеі-сядзібе І.Рэпіна "Здраўнёва" і Полацку.

На выстаўцы, якая, дарэчы, будзе працаваць толькі па 8 ліпеня, прадстаўлены амаль усе работы ўдзельнікаў. Як адзначылі госці мерапрыемстваў, у карцінах шмат паветра, вады, музыкі, любові - жыцця. І Віцебска. Пасля закрыцця выстаўкі тыя творы, якія не застаюцца ў фондах музея, будуць выстаўлены ў дырэкцыі "Славянскага базару" на час фестывалю. Акрамя таго, у Арт-прасторы на Талстога, 7 адкрываецца асобная выстаўка ўдзельніка пленэру з Мінска Мацвея Басава "10 дзён у Віцебску".