Падзеі, факты, анонсы

Каляндар падзей у Беларусі: кастрычнік 2013

Міжнародны музычны фестываль "Залаты шлягер"

Выстаўка "Слуцкія паясы"

Слуцкія паясы – сусветна вядомая рэліквія беларускага народа. Шэдэўры ткацтва ствараліся ў ХVIII - XIX стагоддзях на мануфактурах, самай вядомай з якіх была Слуцкая, што прыналежыла князям Радзівілам. Паясы з шаўковых, залатых і сярэбраных нітак ткалі ўручную па вельмі складанай тэхналогіі. З даўніх часоў яны былі атрыбутам мужчынскага касцюма, сімвалам улады і багацця ўладальніка. На выстаўцы прадстаўлены 4 паясы канца XVIII – пачатку XIX стагоддзяў са збору Львоўскага гістарычнага музея, а таксама партрэты прадстаўнікоў беларускай шляхты XVIII-XIX стагоддзяў.

Калі: 8 мая 2013 – 18 красавіка 2014
Дзе: Мінск, Нацыянальны мастацкі музей

"Ажыўшыя карціны" Андрэя Смаляка

Незвычайная мастацкая галерэя адкрылася ў Мінску на агароджы ўздоўж Парку Чалюскінцаў. Экстравагантны беларускі мастак Андрэй Смаляк і яго жонка Вольга прадставілі публіцы праект "Ажыўшыя карціны", які аб'яднаў стваральніка і выдатных асоб сферы культуры і спорту, бізнесу і палітыкі. З дапамогай каманды прафесіяналаў - дызайнераў, мастакоў па касцюмах, грымёраў, дэкаратараў, фотамастакоў - карціны Андрэя Смаляка ажылі ў фотавобразах з вядомымі беларускімі персонамі. У ролі герояў палотнаў мастака выступілі Максім Мірны, Дар'я Домрачава, Анжаліка Агурбаш, Анатоль Ярмоленка, рэжысёр Андрэй Курэйчык, беларускія зоркі дзіцячага "Еўрабачання"... Сярод будучых удзельнікаў праекта Андрэя Смаляка - актрыса Моніка Белучы, супермадэль свету Кацярына Даманькова, зоркі вялікага спорту.

Калі: 26 мая - лістапад 2013 года
Дзе: Мінск, Парк Чалюскінцаў

Аўстралійскае цыркавое шоу "Чараўніцтва на лёдзе" ў Белдзяржцырку

На працягу некалькіх месяцаў Беларускі дзяржаўны цырк прымае гасцей з Аўстраліі з грандыёзным шоу "Чараўніцтва на лёдзе". Гледачы ўбачаць інтэрнацыянальную каманду прафесіяналаў - шматразовых чэмпіёнаў свету па фігурным катанні з Новай Зеландыі, Аўстраліі і Канады. У праграму таксама ўвайшлі самыя відовішчныя нумары майстроў цырка: ілюзіён "Domina magic" (Італія), кітайскі цыркавы паказ, паветраная гімнастыка (Канада), дрэсура папугаяў (Расія), паветраная акрабатыка (Беларусь).

Дзе: Мінск, Белдзяржцырк
Калі: 7 верасня 2013 – 12 студзеня 2014 года

Выстаўка "Праваслаўны свет. Вобраз Хрыста ў іканаграфіі краін Усходняй Еўропы"

Міжнародная выстаўка прысвечана  святкаванню 1025-годдзя Хрышчэння Русі  і з'яўляецца працягам юбілейнай выстаўкі 2008 года "Праваслаўная ікона Расіі, Украіны, Беларусі", якая з поспехам праходзіла ў Маскве, Кіеве і Мінску. У экспазіцыі прадстаўлены больш за 100 унікальных твораў іканапісу XV - пачатку XIX стагоддзяў з фондаў вядучых музеяў Беларусі, Расіі, Украіны і Сербіі. Наведвальнікі ўбачаць шэдэўры праваслаўнага іканапісу славянскіх народаў, якія ў розных іканаграфічных варыянтах адлюстроўваюць асноўныя падзеі жыцця Хрыста...

Калі: 17 верасня - 5 снежня
Дзе: Мінск, Нацыянальны мастацкі музей Рэспублікі Беларусь
Даведацца больш падрабязна

Рой Янг у Мінску

Легендарны выканаўца джаза, блюза і соўла Рой Янг выступаў на лепшых сцэнах свету са знакамітымі Джэймсам Браўнам, Рэем Чарльзам, Білам Кобэмам, Білі Шэпардам, Даянай Рыўз, аркестрам "American Big-Band". Ён адрадзіў блюз і стаў прадаўжальнікам традыцый жанру ў Еўропе і ЗША. Рэпертуар геніяльнага Янга - музыка 50-90-х у розных стылях - ад джазавага мэйнстрыму да блюза і фанка. У яго інтэрпрэтацыі можна пачуць песні The Beatles, Фрэнка Сінатры, Джэймса Браўна, Рэя Чарльза. На беларускай сцэне ў выкананні маэстра прагучаць сусветныя хіты: "Hoochie Coochie Man", "Hit the Road, Jack", "Blue Moon", "My Way", "What a Wonderful World", "Over the Rainbow", "I Feel Good". Разам з легендарным джазменам на сцэну выйдзе квартэт JAZZinMINSK.

Калі: 1 - 2 кастрычніка
Дзе: Мінск, Палац Рэспублікі

VIII Міжнародны фестываль Юрыя Башмета ў Мінску

Адна з самых яркіх падзей музычнага жыцця сталіцы па традыцыі збярэ на адной сцэне знакамітых артыстаў сучаснасці і маладых таленавітых музыкантаў. Нязменны творчы натхняльнік  фестывалю – першы альтыст свету, народны артыст Расіі, лаўрэат дзяржаўных прэмій СССР і Расіі Юрый Башмет. На цырымоніі адкрыцця выступіць народны артыст Расіі  Канстанцін Хабенскі, які пад музыку ў выкананні камернага ансамбля "Салісты Масквы" будзе чытаць вершы Уладзіміра Маякоўскага. У праграме фестывалю – канцэрты лепшых музыкантаў свету:  Кшыштафа Пендзярэцкага і Андрэса Мустанена, Мікалая Луганскага, Максіма Венгерава, Расціслава Крымера. Аматараў класічнай музыкі чакае незвычайнае спалучэнне розных стыляў і відаў мастацтва ў праектах "Класіка сустракае джаз", "Класіка сустракае РОК!", "Музыка і Цырк"...

Калі: 2 - 12 кастрычніка
Дзе: Мінск, Беларуская дзяржаўная філармонія

Міжнародныя спартыўныя спаборніцтвы "DRAGONWINCH Мерлін-трофі-2013"

"Мерлін-трофі" – гэта гонка на аўтамабілях па бездарожжы, у час якой удзельнікам трэба будзе пераадолець шэраг сур'ёзных перашкод: забалочаныя мясціны, броды і старыя дарогі. Экстрэмальная траса праходзіць праз Альманскія балоты – буйнейшы комплекс верхавых, пераходных і нізінных балот у Еўропе, які захаваўся ў некранутым выглядзе. Акрамя таго, жадаючыя змогуць прайсціся па гістарычных мясцінах Палесся, азнаёміцца з побытам палешукоў і атрымаць асалоду ад некранутай прыроды маляўнічага краю...

Калі: 4 - 6 кастрычніка
Дзе: Брэсцкая вобласць, Столінскі раён, в. Цераблічы, Альманскія балоты

Тыдзень мінскай моды – MSK Fashion Week

Адна з запамінальных падзей fashion-індустрыі года збярэ прадстаўнікоў гандлёвых марак і модных дамоў, мадэльераў, стылістаў і экспертаў не толькі з Беларусі, але і з вядучых краін у свеце моды – Францыі, Італіі, Вялікабрытаніі. У праграме форуму – паказы калекцый беларускіх і замежных дызайнераў сезона вясна-лета 2014, дзелавыя перагаворы, лекцыі, семінары, майстар-класы, выстаўкі і прэзентацыі...

Калі: 8 - 12 кастрычніка
Дзе: Мінск, Дом Масквы

Міжнародны музычны фестываль "Залаты шлягер- 2013"

Фестываль "Залаты шлягер" – візітная картка Магілёва, які ў 2013 годзе стаў культурнай сталіцай Беларусі і СНД. Музычны форум збярэ папулярных выканаўцаў і калектывы з 11 краін - Беларусі, Расіі, Ізраіля, Эстоніі, Кубы, Грузіі, Германіі, Латвіі, Узбекістана, Малдовы, ЗША. У праграме фестывалю – сапраўднае творчае багацце: "Вечары шансона", рэтра-канцэрт "Музычны залаты дождж", канцэрт зорак сусветнага і беларускага джаза з удзелам знакамітага вакаліста-інтэрпрэтатара Кліва Дугла і музыканта Стэнлі Джордана, канцэрт выканаўцаў Магілёўшчыны "Шлягер вачамі магіляўчан", вечар оперы "Кармэн" Вялікага тэатра оперы і балета Рэспублікі Беларусь. Пасля працяглага перапынку адроджаны конкурс маладых выканаўцаў, тэма якога – шлягеры мінулых гадоў. Узначаліць журы міжнароднага конкурсу заслужаны артыст Расіі Бары Алибасов.

Калі: 9 - 13 кастрычніка
Дзе: Магілёў, Палац культуры вобласці, Лядовы палац
Даведацца больш падрабязна

VIII Міжнародная канферэнцыя "Дзелавы інтэрнэт"

Міжнародны форум збярэ прадстаўнікоў вядомых беларускіх і замежных кампаній, якія падзеляцца з усімі жадаючымі практычным вопытам у сферы вядзення бізнесу ў глабальнай сетцы. Удзельнікамі секцыйных пасяджэнняў стануць супрацоўнікі буйнейшых інтэрнэт-кампаній Беларусі і СНД: Admitad GmbH, Google Russia, Netpeak, ArtGraphics, "МойСклад". У праграме канферэнцыі – секцыі, тэматычныя даклады і майстар-класы ад расійскіх і замежных партнёраў па паспяховым прасоўванні бізнес-праектаў у беларускай інтэрнэт-прасторы.

Калі: 10 - 11 кастрычніка
Дзе: Мінск, Палац Рэспублікі

Творчы вечар Івана Ахлабысціна

Расійскі акцёр, рэжысёр, сцэнарыст, журналіст і свяшчэннік Іван Ахлабысцін, шырока вядомы галоўнай роляй у тэлесерыяле "Інтэрны", прадстаўляе ў Беларусі творчы вечар "Духоўныя гутаркі". У інтэрактыўным монаспектаклі прагучаць разважанні артыста на вечныя тэмы – чалавека і сэнсу жыцця, кахання і творчасці, страху і веры. Акрамя таго, у рамках вечара акцёр будзе размаўляць з гледачамі аб тым, што іх хвалюе. Любы жадаючы можа загадзя задаць пытанне Івану Ахлабысціну на яго старонцы ў інтэрнэце або непасрэдна на творчай сустрэчы.

Калі, дзе:
11 кастрычніка - Гомель, ГЦК "Гомель"
12 кастрычніка - Віцебск, КЗ "Віцебск"
17 кастрычніка - Мінск, КЗ "Мінск"

Першы сямейны open-air "Цэнтр Еўропы"

Галоўнай падзеяй незвычайнага свята стане кулінарнае спаборніцтва "Бульбяны рай" па прыгатаванню страў з бульбы пад кіраўніцтвам знакамітых шэф-повараў. Тут жа плануюць устанавіць грандыёзны рэкорд, прыгатаваўшы самую вялікую клёцку ў свеце. Таксама гасцей open-air чакае цікавая забаўляльная праграма: выстаўка больш як 30 сартоў бульбы і дэманстрацыя дызайнерскага арт-аб'екта "Сфера Еўропы", майстар-класы ад вядомых повараў рэстаранаў еўрапейскай кухні, паказальныя выступленні майстроў ролікаў, скейт-борда, акрабатаў і фехтавальшчыкаў, а таксама ўнікальнае коннаспартыўнае шоу "Кавалькада". Жадаючыя змогуць убачыць талісманы і асабістыя рэчы вядомых беларусаў, паспрабаваць сябе ў ролі конніка і асвоіць ультрасучасную інтэрактыўную гульню геакэшынг...

Калі: 12 кастрычніка
Дзе: Мінскі раён, п.Ратамка, Рэспубліканскі цэнтр алімпійскай падрыхтоўкі коннага спорту і конегадоўлі

XIX Міжнародны чэмпіянат лаек па вальернаму дзіку і падсаднаму мядзведзю

У фермерскай гаспадарцы аднаго з самых вядомых заводчыкаў лаек руска-еўрапейскай і заходнесібірскай парод ва Усходняй Еўропе, у мінулым чэмпіёна СССР і рэкардсмена свету 1982 года па цяжкай атлетыцы Аляксандра Барысёнка, штогод праходзяць буйныя спаборніцтвы паляўнічых сабак. Гаспадары і іх гадаванцы з розных краін прыязджаюць у Беларусь, каб ацаніць уменне сабак высочваць і спыняць звера, вызначыць лепшых. Спаборніцтвы праходзяць ва ўмовах, максімальна набліжаных да рэальнасці: дзікоў часова размяшчаюць у агароджаных плотам вальерах, а небяспечнага ляснога драпежніка - мядзведзя - садзяць на ланцуг, свабодна слізгаючы па металічным тросе. Сабакі выходзяць на "паляванне" паасобку і парамі, а суддзі ацэньваюць іх паводзіны баламі...

Калі: 12 - 13 кастрычніка
Дзе: Віцебская вобласць, Сенненскі раён, в.Літусава, сядзіба "Барысёнак А.К."

Scorpions у Мінску

Адна з самых вядомых рок-груп свету, якая прадала больш за 100 мільёнаў копій альбомаў, зноў едзе ў Беларусь. У рамках развітальнага сусветнага тура ў Мінску Scorpions выступяць з Прэзідэнцкім аркестрам Рэспублікі Беларусь пад кіраўніцтвам Віктара Бабарыкіна. Легендарныя музыканты выканаюць кампазіцыі з новага альбома "Comeblack", які выйшаў у лістападзе 2011 года, і "залатыя" хіты за ўсю гісторыю існавання Scorpions – у знак удзячнасці паклоннікам за адданасць. Магія сімфанічнага і рок-гучання будзе прадстаўлена на галоўнай канцэртнай пляцоўцы Беларусі.

Калі: 19 кастрычніка
Дзе: Мінск, МКСК "Мінск-Арэна"

"Браслаўскі спінінг-2013"

Міжнародныя спаборніцтвы па спартыўнаму рыбалоўству "Браслаўскі спінінг" збіраюць аматараў лоўлі і актыўнага адпачынку на прыродзе. Па традыцыі на турнір прыедуць рыбакі з Беларусі, Расіі, Латвіі і Літвы. Удзельнікам спаборніцтваў можа стаць любы жадаючы, хто захапляецца рыбалоўствам, мае плавальныя сродкі і выратавальныя прылады. Акрамя конкурснай праграмы, узнагароджання пераможцаў у розных намінацыях ("Самы вялікі ўлоў па вазе", "Самы юны рыбалоў-аматар", "Самы буйны ўлоў", "Самы вялікі ўлоў") адбудзецца дэгустацыя юшкі.

Калі: 19 кастрычніка
Дзе: Віцебская вобласць, Браслаўскі раён, вадаёмы  Нацыянальнага парку "Браслаўскія азёры"

ХХ Міжнародная выстаўка "Турбізнес-2013"

Каля 100 турфірм і кампаній з Беларусі, блізкага і далёкага замежжа прымуць удзел у самым буйным турысцкім форуме Беларусі. На міжнароднай выстаўцы прафесіяналы і падарожнікі змогуць азнаёміцца з новымі напрамкамі нацыянальнага і замежнага турызму (рэкрэацыйны, сямейны і дзіцячы, паляўнічы і іншыя), навінкамі спартыўнага і турыстычнага рыштунку і абсталявання, паслугамі ў галіне страхавання і бяспекі турызму.

Калі: 23 - 25 кастрычніка
Дзе: Мінск, НВЦ "БелЭкспа"

Тэатр Фламенка Томаса дэ Мадрыд у Мінску

Фламенка, які аб'яднаў лепшыя рысы іспанскай і цыганскай танцавальнай культуры, нязменна знаходзіць прыхільнікаў па ўсім свеце, зачароўваючы свабодай, гарачынёй выканання, музычнасцю і арыгінальнымі ўборамі. На беларускай сцэне іспанскі тэатр Томаса дэ Мадрыд прадставіць незабыўны, эмацыянальны песенна-танцавальны спектакль з удзелам прафесійных артыстаў. У праграме – традыцыйныя танцы фламенка: алегрыяс, салеас, таранта, севільяна, сігірыя, фарука і знакамітае танга.

Калі: 25 кастрычніка
Дзе: Мінск, КЗ "Мінск"

Мілен Фармэр у Мінску

Адна з самых вядомых выканаўцаў нашага часу Мілен Фармэр увайшла ў гісторыю французскага шоу-бізнесу як уладальніца рэкорднай колькасці брыльянтавых дыскаў - 6 альбомаў. У рамках гастрольнага тура "Timeless 2013" спявачка ўпершыню наведае беларускую сталіцу і прэзентуе свой новы альбом "Monkey Me", які стаў сімвалам адраджэння самага паспяховага ў гісторыі французскай поп-музыкі творчага тандэму з кампазітарам Ларанам Бутана. Гледачоў чакае грандыёзнае шоу на высокім тэхнічным узроўні, з сінхранізацыяй візуальнага і гукавога рада, вялікім наборам спецэфектаў, цудоўнымі пастановачнымі нумарамі.

Калі: 27 кастрычніка
Дзе: Мінск, МКСК "Мінск-Арэна"

Міжнароднае шоу Маскоўскага Мюзік-Хола ў Мінску

У рамках сусветнага гастрольнага тура Маскоўскі Мюзік-Хол упершыню прадставіць у Беларусі захапляючае танцавальнае шоу "Феерычнае рэвю". Над дэкарацыямі і сцэнічным афармленнем працавала каманда знакамітых італьянскіх майстроў. Асаблівай увагі заслугоўваюць касцюмы артыстаў – сапраўдныя творы мастацтва, упрыгожаныя пер'ем і камянямі рэдкіх парод, ручной вышыўкай і аплікацыямі. Больш за 40 артыстаў, якія задзейнічаны ў спектаклі, створаць атмасферу рускай вёскі, кабарэ Парыжа, карнавалу ў Рыа і чароўнага танга на вуліцах Буэнас-Айрэса.

Калі: 27, 30 кастрычніка
Дзе: Мінск, КЗ "Мінск"

Кубінскае шоу "Passion de Buena Vista" ў Мінску

Самыя яркія кубінскія вакалісты, танцоры, музыканты ўпершыню прывязуць у Мінск каларытную, тэмпераментную праграму "Passion de Buena Vista". Госці шоу акунуцца ў непаўторную атмасферу кубінскіх начэй, свята жыцця, якое прыходзіць на вуліцы Гаваны разам з іскрамётнымі рытмамі нацыянальнай музыкі.

Калі: 29 кастрычніка
Дзе: Мінск, Палац Рэспублікі

Аляксандр Васільеў у Мінску

Сусветна вядомы рускі і французскі гісторык моды, тэатральны мастак, мастацтвазнавец, калекцыянер, аўтар папулярных кніг і артыкулаў, ганаровы член Расійскай Акадэміі мастацтваў і вядучы праграмы "Модны прыгавор" Аляксандр Васільеў прачытае ў Мінску лекцыю "Я сёння ў модзе, сучасныя тэндэнцыі ў модзе". Слухачоў чакае займальны расказ пра гісторыю моды, выдатных куцюр'е і маладых дызайнераў, прыгажунь сусветнага подыума і іконы стылю розных эпох. Акрамя таго, мэтр Васільеў адкажа на пытанні пра сябе і сучасныя тэндэнцыі моды, раскрые некаторыя таямніцы fashion-індустрыі.

Калі: 29 кастрычніка
Дзе: Мінск, ДК "МАЗ"

Балет Леаніда Якабсона "Спартак" у Мінску

Знакаміты Санкт-Пецярбургскі дзяржаўны акадэмічны тэатр балета імя Леаніда Якабсона прадставіць у Мінску пастаноўку "Спартак" – адноўленую версію аднаго з самых вядомых балетаў маэстра. "Сцэны з рымскага жыцця", як вызначыў жанр балета легендарны харэограф, змяняюць адна адну з кінематаграфічнай хуткасцю. Баі гладыятараў, шэсці легіянераў, балі і оргіі рымскай знаці, святы плебсу і паўстанне рабоў зліваюцца ў адзінае тэатральна-маляўнічае палатно жыцця антычнага Рыма. Упершыню ў гісторыі балета Леанід Якабсон адмовіўся ад акадэмічных канонаў і пабудаваў спектакль на аснове "свабоднай пластыкі", апрануўшы выканаўцаў у тунікі і сандалі замест пуантаў.

Калі: 31 кастрычніка
Дзе: Мінск, Нацыянальны акадэмічны Вялікі тэатр оперы і балета Беларусі