Галоўныя навіны

Паралімпійскі чэмпіён беларус Ігар Бокій не чакаў, што заваюе шэсць медалёў

13 верасня, Мінск /Хрысціна Курловіч - БЕЛТА/. Паралімпійскі чэмпіён Ігар Бокій не чакаў, што заваюе столькі медалёў на Паралімпіядзе-2012 у Лондане. Аб гэтым ён 12 верасня паведаміў журналістам у Нацыянальным аэрапорце Мінск, перадае карэспандэнт БЕЛТА.

З дзесяці ўзнагарод беларускай каманды на Паралімпійскіх гульнях-2012 у Лондане плывец Ігар Бокій заваяваў шэсць у катэгорыях S13 і SM13. 31 жніўня ён выйграў золата на дыстанцыі 100 м батэрфляем, 1 верасня стаў сярэбраным прызёрам на 50 м вольным стылем, 2 верасня папоўніў калекцыю золатам на стаметроўцы вольным стылем, 3 верасня выйграў золата з сусветным рэкордам на 100 м на спіне, 4 верасня стаў лепшым на дыстанцыі 400 м вольным стылем, зноў устанавіўшы рэкорд планеты, а 7 верасня з чарговым сусветным рэкордам выйграў дыстанцыю 200 м комплексным плаваннем.

"Сам, шчыра кажучы, не чакаў, што заваюю столькі медалёў. Канкрэтных планаў на медалі мы не ставілі, працавалі на рэзультат", - сказаў Ігар Бокій.

Ён прызнаўся, што сакрэт яго поспеху - старанная работа над сабой, а таксама карпатлівая праца трэнера, якога ён ва ўсім слухаў. "Я паказаў максімальны рэзультат і вельмі ім задаволены. Але ў маіх планах новыя рэкорды", - сказаў Ігар. Таксама плывец адзначыў цёплы прыём на радзіме: "Я вельмі ўражаны. Вельмі прыемна, што нас сустракае столькі людзей".

Сярод сустракаючых паралімпійцаў гасцей былі і самыя галоўныя для Ігара людзі - бацькі і малодшы брат Яўген. Родныя чэмпіёна прызналіся, што вельмі перажывалі за сына і брата. "Эфіры не глядзелі, чакалі званка трэнера. Вядома, мы спадзяваліся на медалі, але нават падумаць не маглі, што іх будзе столькі", - сказала маці Ігара Алена. Бацька Аляксандр Бокій у сваю чаргу расказаў, што Ігара аддалі ў плаванне, "каб накіраваць энергію дзіцяці ў правільнае рэчышча".

У аэрапорце 12 верасня сустрэлі 31 спартсмена-паралімпійца, якія прадстаўлялі Беларусь у сямі відах спорту: лёгкай атлетыцы, плаванні, акадэмічным веславанні, фехтаванні, дзюдо, веласпорце, паўэрліфтынгу. Сярод іх былі сярэбраны прызёр на дыстанцыі 100 м брасам у катэгорыі SB12 плывец Уладзімір Ізотаў і бронзавыя прызёры лёгкаатлет Аляксандр Субота, які здабыў бронзу ў трайным скачку ў катэгорыі F46, Людміла Волчак, якая заняла трэцяе месца ў акадэмічным веславанні, і Ганна Канюк, якая стала медалісткай у скачках у даўжыню ў катэгорыі F11/12.

У медальным заліку Паралімпійскіх гульняў Беларусь з пяццю залатымі, дзвюма сярэбранымі і трыма бронзавымі ўзнагародамі заняла 25-е месца. Усяго ў лонданскіх Паралімпійскіх гульнях спаборнічалі больш як 4 тыс. спартсменаў са 165 краін, якія разыгралі 502 камплекты ўзнагарод у 20 відах спорту.

версія для друку

зрабіць стартавай

дабавіць у выбранае