Падзеі

Дзмітрый Мірончык адзначыў, што ў МЗС са шкадаваннем успрынялі паведамленне аб тым, што пасольства ЗША ў Расіі спыніла прыём дакументаў на афармленне віз для грамадзян Беларусі.

"Спадзяёмся, што, прыняўшы сённяшняе рашэнне, амерыканскі бок знойдзе магчымасць пашырыць работу консульскага аддзела свайго пасольства ў Мінску. Упэўнены, што прадастаўленне грамадзянам Беларусі магчымасці афармляць візы ў ЗША без выезду ў сумежныя краіны садзейнічала б пашырэнню міжасобасных кантактаў, а таксама развіццю супрацоўніцтва паміж нашымі краінамі", - сказаў прэс-сакратар.

"Вельмі сумна, што адносіны паміж Расійскай Федэрацыяй і Злучанымі Штатамі прадаўжаюць ускладняцца і гэта ўжо негатыўна адбіваецца непасрэдна на простых беларусах, - дадаў Дзмітрый Мірончык. - Кіруючыся ў першую чаргу інтарэсамі Беларусі і яе грамадзян, выказваем надзею на больш хуткую нармалізацыю расійска-амерыканскіх адносін, якая, мы ўпэўнены, пазітыўна выявілася б на сітуацыі ў свеце ў цэлым".