Бізнес-навіны

Сумесную вытворчасць малагабарытнай тэхнікі BELARUS плануюць арганізаваць на Кубе

Фота МТЗ

18 ліпеня, Мінск /Кар. БЕЛТА/. Бабруйскі завод трактарных дэталей і агрэгатаў, які ўваходзіць у склад "МТЗ-Холдынга", плануе арганізаваць на Кубе сумесную вытворчасць малагабарытнай тэхнікі BELARUS. Аб гэтым сказаў начальнік упраўлення маркетынгу і збыту прадпрыемства Сяргей Маслакоў, паведамілі БЕЛТА ў прэс-службе МТЗ.

"Нядаўна наш завод наведалі прадстаўнікі групы кампаній GESIME і Надзвычайны і Паўнамоцны Пасол Рэспублікі Куба ў Беларусі Санцьяга Перэс Бенітэс. На сустрэчы мы прапрацоўвалі праект па арганізацыі зборкі малагабарытных трактароў BELARUS на базе вытворчых плошчаў "Завода імя Герояў 26 ліпеня" ў горадзе Альгін", - расказаў Сяргей Маслакоў. Раней бабруйскі завод перадаў кубінскаму боку спіс абсталявання, неабходнага для выпуску малагабарытных трактароў BELARUS.

Цяпер на Кубе працуюць каля 120 тыс. трактароў беларускай і расійскай вытворчасці. Асабліва распаўсюджана мадэль МТЗ-80. На перагаворах кубінскі бок выказаў зацікаўленасць у набыцці запасных частак да беларускіх трактароў. "Арыгінальныя запчасткі дазволяць кубінскім аграрыям прадоўжыць тэрмін службы тэхнікі. Цяпер мы ўзгадняем цэны і колькасць вырабаў", - растлумачыў Сяргей Маслакоў.

У прэс-службе адзначылі, што генеральны дырэктар ААТ "МТЗ" Віталь Воўк цяпер знаходзіцца на Кубе ў складзе прадстаўнічай беларускай дэлегацыі.

Бабруйскі завод трактарных дэталей і агрэгатаў - сучаснае прамысловае прадпрыемства, якое вырабляе трактарную тэхніку маркі BELARUS для сельскай і камунальнай гаспадаркі, запасныя часткі і колавыя дыскі. 1 жніўня 2014 года ўвайшоў у "МТЗ-Холдынг".

версія для друку

зрабіць стартавай

дабавіць у выбранае