Падзеі

МЗС апублікавала даклад аб рэзанансных выпадках парушэння правоў чалавека ў асобных краінах

Фота з архiва

22 чэрвеня, Мінск /Кар. БЕЛТА/. Міністэрства замежных спраў Беларусі апублікавала на сваім сайце даклад аб найбольш рэзанансных выпадках парушэння правоў чалавека ў асобных краінах свету. Даклад таксама быў прадстаўлены на панэльнай дыскусіі "75-я гадавіна Усеагульнай дэкларацыі правоў чалавека: важнасць выканання дзяржавамі міжнародных абавязацельстваў" у час 53-й сесіі Савета па правах чалавека ў Жэневе, паведамляе БЕЛТА.

"Даклад з'яўляецца лагічным працягам існуючай практыкі па шырокім асвятленні знешнепалітычным ведамствам інфармацыі аб тых укаранелых сістэмных праблемах, якія зведваюць заходнія грамадствы ў галіне выканання правоў чалавека, - адзначыў міністр замежных спраў Сяргей Алейнік. - Гэты дакумент не прызначаны судзіць тыя ці іншыя краіны па прыкмеце эфектыўнасці рэалізацыі правоў чалавека. Ідэальных дзяржаў у такіх адносінах проста не існуе. Наіўна было б лічыць, што лякалы грамадскага ўкладу адных краін могуць стаць універсальнай меркай для жыцця іншых дзяржаў, якія маюць іншую гісторыю, культуру, побыт. Гэтак жа як і ў корані абсурднай будзе спроба вынесці вердыкт ці даць некаму ацэнку, чым часта грашаць, дарэчы, самі заходнія краіны".

У аснову даклада, акрамя зводак СМІ, пакладзены звесткі са справаздач універсальных перыядычных аглядаў Савета ААН па правах чалавека (СПЧ), заключэнняў спецыяльных працэдур СПЧ і міжнародных праваабарончых органаў, дакладаў рэгіянальных і нацыянальных НУА. Даклад дэманструе агульную, характэрную для ўсіх заходніх краін канфігурацыю праблем - гэта сістэмная дыскрымінацыя ў грамадстве, практычна штодзённыя сілавыя разгоны мірных пратэстуючых, якія выступаюць за паляпшэнне сацыяльна-эканамічных правоў насельніцтва, парушэнні правоў бежанцаў і мігрантаў, блакіроўка доступу да СМІ, якія вяшчаюць альтэрнатыўны ўрадавы пункт гледжання.

"Усё гэта ярка праілюстравана ў дакладзе на прыкладзе канкрэтных кейсаў, якія адкрыта дэманструюць двайныя стандарты заходніх краін у адносінах да выканання правоў чалавека ў сябе дома і ў іншых дзяржавах. Забеспячэнне правоў чалавека з'яўляецца перш за ўсё ўнутранай справай кожнай дзяржавы, паколькі складае важную частку штодзённай работы ўсіх органаў дзяржаўнай машыны. І заходнія краіны не з'яўляюцца нейкім выключэннем. Кожная краіна ўнікальная ў сваёй разнастайнасці, і няма адзінага рэцэпта, які можна было б прымяніць да ўсіх грамадстваў. На жаль, гэтага разумення сёння катастрафічна не хапае вельмі многім. Ніхто ў сучасным свеце не сумняваецца ў важнасці правоў чалавека. Аднак усім неабходна пазбавіцца ад памылковай перакананасці ў наяўнасці ўніверсальнага кансэнсусу аб нейкім ідэальным або прымальным міжнародным стандарце выканання канцэпцыі правоў чалавека", - падкрэсліў Сяргей Алейнік.

Міністр упэўнены, што ўзаемапаважлівы дыялог і ўлік нацыянальных асаблівасцей развіцця кожнай канкрэтнай краіны павінны быць вызначальнымі ў міждзяржаўных узаемаадносінах, у тым ліку па правах чалавека, да чаго Беларусь заўсёды заклікала.

Аб'ём даклада - больш за 80 старонак. Вось некаторыя прыклады парушэння правоў чалавека ў краінах Захаду. Так, у Бельгіі, паводле даных экспертаў Amnesty International, умовы ў турмах "бесчалавечныя", няма доступу нават да санітарна-гігіенічных памяшканняў і медыцынскага абслугоўвання.

У Германіі ў 2022 годзе паліцэйскія задушылі 64-гадовага чарнаскурага мужчыну. Ён павінен быў быць пераведзены з дома састарэлых для псіхічнахворых у псіхіятрычную бальніцу. Паводле версіі сведак, "мужчына не супраціўляўся. Ён проста закрыў дзверы свайго пакоя, таму што запанікаваў, убачыўшы супрацоўнікаў у паліцэйскай форме. Апошнія зафіксавалі яго на падлозе, адзін з якіх націснуў яму каленам на шыю. Мужчына сплываў крывёй і ў рэшце рэшт перастаў дыхаць".

А ў Латвіі 22,5 працэнта насельніцтва жыве на мяжы беднасці. У Нідэрландах юрыдычны статус паліцэйскіх супастаўны са статусам членаў парламента альбо міністраў. Гэта значыць, да іх не можа прымяняцца крымінальнае праследаванне.

У Польшчы 26 чэрвеня 2022 года ў Інаўроцлаве супрацоўнікі паліцыі прымянілі слёзатачывы газ у адносінах да групы дэманстрантаў, якія выступілі супраць лідара правячай партыі "Закон і справядлівасць" Яраслава Качыньскага. Затрыманыя былі абезрухоўлены з прымяненнем фізічнай сілы і наручнікаў і змешчаны ў аўтазак. Па заявах аднаго з іх, паліцэйскія душылі яго, наступалі на спіну, а таксама пагражалі ўдарыць электрашокерам. Другога затрыманага білі нагамі па галаве, выкручвалі рукі. Адна з фотажурналістаў зведала праследаванні за фатаграфіі з акцыі пратэсту.

У ЗША ў 2022 годзе было толькі 15 дзён, калі паліцэйскія не забівалі людзей і не стралялі ў іх. А ў Францыі за гэты ж перыяд колькасць зняволеных у краіне наблізілася да 73 тыс. чалавек, што з'яўляецца абсалютным рэкордам за ўсю гісторыю.

версія для друку

зрабіць стартавай

дабавіць у выбранае