Бізнес-навіны

Рухавікі ММЗ устаноўлены на рачныя судны і паспяхова праходзяць выпрабаванні на адкрытай вадзе

Фота ММЗ

8 жніўня, Мінск /Кар. БЕЛТА/. Новыя рухавікі Мінскага маторнага завода, якія адпавядаюць патрабаванням Расійскага класіфікацыйнага таварыства, устаноўлены на рачныя судны і паспяхова праходзяць выпрабаванні на адкрытай вадзе, паведамілі карэспандэнту БЕЛТА ў прэс-службе прадпрыемства.

Расійская кампанія "Марскія прапульсіўныя сістэмы" набыла ў Мінскага маторнага завода чатыры 4-цыліндравыя дызельныя рухавікі MMZ-4DTGRR магутнасцю 46 кВт для размяшчэння ў дызель-генератарныя ўстаноўкі. Маторы, распрацаваныя спецыяльна для прымянення на рачных суднах, ужо ўстаноўлены на судны і паспяхова праходзяць выпрабаванні на адкрытай вадзе.

"Навінка створана на базе прамысловых рухавікоў ММЗ. Упершыню ў гісторыі беларускія маторы эксплуатуюцца ў складзе рачной тэхнікі. Акрамя ўсіх канструктарскіх і тэхналагічных асаблівасцей вытворчасці, гэтыя рухавікі павінны былі прайсці абавязковую сертыфікацыю Расійскага класіфікацыйнага таварыства на адпаведнасць усім патрабаванням рэгламенту", - падкрэслілі ў прэс-службе.

На базе Мінскага маторнага завода сумесна з экспертам РКТ быў праведзены поўны цыкл выпрабаванняў, які ўключае пацвярджэнне паказчыкаў экалагічнай бяспекі прадстаўніка новай сям'і рухавікоў MMZ-4DTGRR. Таксама праведзены аналіз тэхнічнай дакументацыі вытворчасці з канстатацыяй высокапрафесійнай работы калектыву беларускіх канструктараў, тэхнолагаў і інжынераў. Пасля станоўчага праходжання выпрабаванняў быў выдадзены сертыфікат адпаведнасці, які адзначае высокую якасць прадукцыі нацыянальнага вытворцы матораў і дае магчымасць выпускаць гэту мадыфікацыю рухавікоў.

У новай лінейцы рухавікоў прыменены шэраг найноўшых канструктарскіх распрацовак, рухавікі поўнасцю адаптаваны пад новы від тэхнікі, што істотна пашырыла сферу іх прымянення.

"Мінскім маторным заводам зроблены вялікі прамысловы крок на шляху імпартазамяшчэння гэтага віду прадукцыі ў расійскага спажыўца. Ужо ў бліжэйшым будучым уся лінейка рухавікоў Мінскага маторнага будзе адаптавана пад патрабаванні рачнога і марскога рэгістра. На сённяшні дзень прадаўжаюцца стэндавыя выпрабаванні і іншых мадыфікацый рухавікоў гэтай лінейкі", - адзначылі ў прэс-службе.

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вырабе сучасных трох-, чатырох-, шасці - і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 кВт да 330 кВт, прызначаных для ўстаноўкі на сельскагаспадарчую, дарожна-будаўнічую тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры прадпрыемстваў Беларусі, краін СНД і далёкага замежжа. Пры вытворчасці рухавікоў выкарыстоўваюцца камплектуючыя сусветна вядомых кампаній.

версія для друку

зрабіць стартавай

дабавіць у выбранае