Падзеі, факты, анонсы

8 жніўня, Мінск /Кар. БЕЛТА/. Нацыянальны акадэмічны Вялікі тэатр оперы і балета Беларусі рыхтуе прэм'еру балета "Жар-птушка" Ігара Стравінскага. Аб гэтым БЕЛТА паведамілі ў службе маркетынгу, інфармацыі і рэкламы тэатра.

Упершыню гэта пастаноўка была прадстаўлена знакамітай антрэпрызай Сяргея Дзягілева "Рускія сезоны" на сцэне парыжскай Гранд-Оперы ў 1910 годзе. Балет паводле матываў рускіх народных казак з лібрэта і харэаграфіяй легендарнага Міхаіла Фокіна ў мастацкім афармленні Леона Бакста і Аляксандра Галавіна ўвайшоў у гісторыю рускага і сусветнага мастацтва. У новым тэатральным сезоне спектакль папоўніць рэпертуар Вялікага тэатра Беларусі.

Галоўныя партыі выканаюць вядучыя артысты балетнай трупы: народныя артысты Беларусі Ігар Артамонаў, Вольга Гайко, Людміла Кудраўцава; заслужаныя артысты Ірына і Алег Яромкіны, Антон Краўчанка; лаўрэаты і дыпламанты міжнародных конкурсаў Ягор Азаркевіч, Кацярына Алейнік, Ігар Аношка, Людміла Хітрова, Аляксандра Чыжык; салісты Марына Вежнавец, Юрый Кавалёў, Іван Савянкоў, Ганна Фокіна і інш.

Ставіць балет народны артыст Расіі Андрыс Ліепа. "Я вельмі цаню тое арыстакратычнае багацце, якое ёсць у Вялікім тэатры Беларусі. Галоўныя партыі ў спектаклі рэпеціруюць пяць пар, а такую раскошу сабе могуць дазволіць толькі сур'ёзныя тэатры", - адзначае рэжысёр.

Першы паказ спектакля запланаваны на 3 кастрычніка. У новым сезоне аматары харэаграфіі ўбачаць і іншыя прэм'еры: балеты "Лаўрэнсія" на музыку Аляксандра Крэйна, рэжысёрам якога выступае Ніна Ананіяшвілі, і "Маленькі прынц" Яўгена Глебава, над якім працуе Аляксандра Ціхамірава.