Падзеі, факты, анонсы

8 сакавіка, Мінск /Карына Навіцкая - БЕЛТА/. Творчы вечар народнага артыста Расіі і легендарнага кампазітара Ігара Крутога адбудзецца 15 мая ў Мінску, паведамілі БЕЛТА арганізатары шоу.

Маэстра Ігар Крутой не так даўно (7 лістапада мінулага года) выступаў у Беларусі. У яго творчым вечары ўдзельнічалі зоркі расійскай эстрады: Філіп Кіркораў, Валерыя, Мікалай Баскаў, Валерый Лявонцьеў, Ігар Нікалаеў, Крысціна Арбакайтэ, Ірына Дубцова і іншыя.

Як адзначаюць арганізатары шоу, Ігара Крутога настолькі ўразіла атмасфера сардэчнага і цёплага прыёму беларусаў на мінулым творчым вечары, што ён вырашыў вярнуцца, але ўжо з новай канцэртнай праграмай "На біс..!" і іншым складам расійскіх музыкантаў.

Паклоннікі і прыхільнікі таленту вядомага кампазітара і спевака змогуць пачуць музычныя кампазіцыі, хіты розных дзесяцігоддзяў, і таксама новыя песні, якія ўжо сталі папулярнымі і любімымі ў слухачоў.

У грандыёзным шоу прымуць удзел Ірына Алеграва, Мікалай Баскаў, Сяргей Лазараў, Ларыса Доліна, Анжаліка Варум і Вольга Кармухіна. На адной сцэне з прадстаўнікамі расійскага шоу-бізнесу выступіць таксама Лара Фабіян - франкамоўная спявачка бельгійска-італьянскага паходжання. Яна выконвае песні на французскай, англійскай, італьянскай, іспанскай, рускай і іншых мовах.