Падзеі, факты, анонсы

22 студзеня, Гродна /Алена Стасюкевіч - БЕЛТА/. Арыгінальную прэзентацыю розных відаў мастацтва прадставяць на XI Рэспубліканскім фестывалі нацыянальных культур у Гродне, паведаміў карэспандэнту БЕЛТА першы намеснік начальніка галоўнага ўпраўлення ідэалагічнай работы, культуры і па справах моладзі Гродзенскага аблвыканкама Аляксандр Вярсоцкі.

Арганізатары рыхтуюць сюрпрызы гасцям свята, гатовы папярэдні план правядзення фестывалю ў 2016 годзе. Сцэнарысты прапанавалі асаблівую канцэпцыю аднаго з самых яркіх мерапрыемстваў - традыцыйнага шэсця прадстаўнікоў нацыянальных аб'яднанняў. У гэтым годзе яго тэма звязана з мастацтвам. Ідэяй шэсця стане прэзентацыя розных відаў мастацтва, якія будуць насычаны нацыянальным каларытам і прадстаўлены рознымі нацыянальнасцямі. Напрыклад, музыку прадставяць карэйскія барабаны, танец - класічны рускі балет, тэатральнае мастацтва - дэманстрацыя відовішчнага паказу з кітайскім драконам. У бягучым годзе ўдзельнікі на шэсці могуць удзельнічаць на конях, у кібітках і інш. У выніку парад павінен атрымацца відовішчным і падтрымліваць тэму Года культуры, растлумачыў субяседнік.

Сярод іншых новаўвядзенняў - правядзенне спартыўных спаборніцтваў для нацыянальных каманд і фэшн-шоу, на якім прадэманструюць сучасныя тэндэнцыі выкарыстання нацыянальных традыцый у штодзённым адзенні. Запланаваны іншыя мерапрыемствы, якія арганізатары пакуль трымаюць у сакрэце.

У Мінску 21 студзеня адбылося пасяджэнне аргкамітэта па правядзенні XI Рэспубліканскага фестывалю нацыянальных культур у Гродне пад кіраўніцтвам намесніка прэм'ер-міністра Наталлі Качанавай. На ім разгледжана канцэпцыя фестывалю, план мерапрыемстваў і падрыхтоўкі горада да яго правядзення. Наступнае пасяджэнне запланавана на красавік у Гродне.